DILI, 25 SETEMBRU 2026 — Ministériu Administrasaun Estatál (MAE), liuhusi Vise-Ministru Administrasaun Estatál, Jacinto Rigoberto Gomes de Deus, hamutuk ho Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, ohin sexta-feira, lidera enkontru kona-ba rezultadu levantamentu dadus rai ne’ebé sei utiliza ba konstrusaun estasionamentu públiku iha área li'ur husi Postu Integradu Fronteira (PIF) Batugede. enkontru ne'e halao iha Salaun MAE, Kaikoli.

Objetivu prinsipál husi enkontru ne’e mak atu rekolla informasaun hodi diskute kona-ba situasaun no estatutu rai hamutuk 11,28 hektares ne’ebé sei utiliza ba konstrusaun estasionamentu iha Batugede, nune’e terminál ne’e bele responde ba movimentu viatúria sira iha área Fronteira Timor-Leste.

Iha intervensaun husi SEATOU, haktuir katak estasionamentu foun ne'e sei funsiona atu regulariza veíkulu sira ne'ebé durante para de'it iha estrada ninin ka iha li'ur areadores portaun fronteira nian. Liuhusi pasu ne'e, Munisípiu Bobonaro bele hetan biban hodi ordena no jere estasionamentu ne'e, ho prinsípiu atu munisípiu bele iha mós reseita rasik.

“Estasionamentu ne’e foka liu ba transporte públiku sira ne'ebé halo viajen husi Díli ba Batugede, inklui mós transporte sira husi Indonézia mai Batugede, nune'e sira hotu bele para ho orden iha estasionamentu ne’e”. tenik Sekretáriu Estadu SEATOU.

Vise-Ministru Administrasaun Estatál fó apresiasaun boot ba dezempeñu servisu ekipa interministeriál ne'ebé lidera husi SEATOU. "Ha'u akompaña tebes servisu ne'ebé ekipa konjunta halo. Maske hasoru difikuldade barak, maibé sira konsege muda duni imajen sidade nian ba di'ak liu tan, no mudansa ne'e signifikativu tebes”.

“Estasionamentu ne'e mós nu'udar preparasaun ida ba dezentralizasaun, hodi kompleta kbiit munisípiu nian liuliu ba munisípiu sira iha área fronteira ne'ebé iha poténsia boot hodi ajuda hatama reseita ba taxa munisípiu nian". dehan Vise-Ministru Jacinto Rigoberto.

Iha enkontru ne'e, ekipa sira deside sei kontinua hala'o enkontru ba daruak iha Batugede, nune’e bele envolve mós Estrutura Autoridade Munisipál Bobonaro, Autoridade Lokál, no lia-nain sira, ne’ebé planeia sei hala'o iha semana oin.

Partisipa mós iha enkontru ne’e, Diretór Jerál Terras no Propriedades, Dr. Lucas António da Costa, reprezentante husi Autoridade Aduaneira (AA), Diretor, Xefia no tékniku relevante sira husi instituisaun rua nian, reprezentante Diresaun Nasional Transportes Terrestres (DNTT), Diretor Nasional Servisu Organizasaun Urbana (DNSOU).