Manufahi- 06 Outubru 2026 reprezentante Ministru Agrikultura, Pekuária, Peska no Floreresta (MAPPF) ho Prezidenti Autoridade Munisipal (PAM) Manufahi hamutuk ho komunidade Agrikultór sira lansa aktividade Koilleta hare uza makina agrikola modernu. Atividade ne’e realiza iha Aldeia Uma Ferik, Suku Uma Berloik, Postu Administrativu Alas.

Iha Intervista Reprezentante Ministru MAPPF atual Diretór Jeral Agrikultura Café Plantas Industria Martinho Laurentino Soares esplika, Tuir planu lolos Ministru MAPPF maka marka prezensa iha koilleta ida ne’e maibe infelizmente iha aktividade seluk ne’ebe labele husik hela no delega DG hamutuk ho PAM Manufahi hamutuk ho komunidade Agrikultór sira hodi koilleta Koilleta hare uza makina agrikola modernu iha area natar Aldeia Uma ferik nian.

”Ita hatene katak ita nia rai produtivu iha Timor Laran tomak ne’e iha rai boot mais porvolta de 100 mil hectares to’o agora area produtivu sira ne’ebé mak ita komesa hadia desde uku naan mai ita komesa hadia investimentu governu kada tinan MAPPF tau osan boot tebtebes hodi hadi’a irrigasaun sira, sosa makina, sosa ai-moruk, sosa fini, ho komitmentu governu nian maibe laos hare deit ba agrikultura maibe setor hotu hotu infelizmente MAPPF nia osan desde IX governo mai kada tinan sempre tun. Tanba ne’e MAPPF iha komitmentu atu nafatin apoiu.” Katak DG

Iha Fatin hanesan PAM Manufahi Luis Marcal da Costa Tavares hatutan, ita nia agrikultór sira uza ekipamentu modernu hafasil tebes sira nia servisu, kompara ho manual sira nia servisu iha natar latar laran demora tebes, se ita atu hasa’e produsaun ita presiza ekipamentu modernu sira atu nune’e bele fasilita ita nia komunidade agrikultór sira. Tanba ne’e ekipamentus sira ne’ebé mak apoiu husi MAPPF ajuda tebes komunidade agrikultór sira fo apoiu no fasilita tebes sira sira nia servisu iha terenu.

Nune’e mós agrikultór Tomas da Costa Hornai haktuir, durante ne’e sira lakon barak gastu boot hodi selu ema, maibe depois de hetan apoiu makina agrikola husi MAPPF sira sente kontente tebes, no sira mós hato’o agradese barak ba MAPPF tanba bele apoiu ona makina ba sira hodi fasilita sira nia servisu iha kampo.

“Ba oin ami sei loke tan natar tuir kapasidade be’e ne’ebé mak iha, ami hakarak hato’o ba governu atu ba oin hare netik ami nia irrigasaun ne’eb’e mak aat no ida ne’ebé sei manual hela. Bainhira makina ne’e to’o ona ami nia liman ami tenki tau ba manutensaun bainhira nia iha failansu ne’ebé kiik ami tenke responde ami sei la tane liman ba governu tanba governu gasta osan boot ida mak hodi hola makina ida ne’e. “ agrikultór ne’e salienta

Aktividade ne’e partisipa husi DG ACPI reprezenta Ministro MAPPF, PAM Manufahi, APA Alas, Extensionista, komunidade agrikultór hetan mós seguransa masimu husi instituisaun FFDTL no PNTL.