Liquiça loron 5, fulan-Outubru, tinan 2026, Sekretáriu Estadu ba Formasaun Profisionál no Empregu Sua Exelénsia Rogério Araújo Mendonça L.Ed hamutuk ho Prezidente Autoridade Munisípiu Liquiça Sr. Paulino Ribeiro partisipa iha Distribuisaun Sertifikadu lian Inglés ba formandu na'in 201 etapa III, iha Munisípiu Liquiça.

Iha diskursu Presidente Autoridade Munisípiu Likisa hateten, karik formandu hetan oportunidade ba servisu iha rai liur, atu nafatin haruka osan mai hodi hadiak ekonomia familia, Munisípiu no nasaun ida ne'e.

"Husi sertifkadu ida ne'e ohin imi simu, karik imi hetan oportunidade ba servisu iha Austrália fila mai imi sei Kontribui ba dezenvolvimentu rai ida ne'e liuhusi imi hasa'e kresimentu ekonomia hodi hadia ekonomia familia, hasa'e ekonomia munisípiu Liquiça no ekonomia nasaun ida ne'e," hateten Presidente Autoridade Munisípiu Liquiça.

PAM ne'e haktuir, Juventude Liquiça oan ba futuru Liquiça no nasaun, nia husu nafatin vontade tomak aprende hodi bele hetan netik buat ruma iha futuru.

"Presidente Autoridade agradese tebes, tau fiar ba ita boot sira futuru ba Liquiça, futuru Timor-Leste, tanba ne'e mak aprende aprende no aprende, hodi hasa'e kresimentu ekonomia" haktuir PAM.

Iha fatin hanesan Sekretáriu Estadu fundamenta katak, programa formasaun lian Inglés ida ne'e, kontinuasaun husi programa PALM nian ne'ebé hahu teste iha tinan hira liu ba kotuk, kandidatu sira ne'ebé valor la di'ak kontinua formasaun hodi hetan oportunidade hanesan.

"Hanesan ita hatene katak iha tinan 2023, programa PALM nian halo rekrutamentu ba alin traballadór barak hodi ba servisu iha Australia, kandidatu barak mak tuir, balun valor di'ak los, balun di'ak naton, balun la di'ak liu, ho nune'e mak balun la di'ak liu ne'e ita prepara formasaun atu sira mós bele hetan oportunidade hanesan ho sira seluk, liuhusi ita prepara kondisaun no halo rekrutamentu ba formadór sira hodi bele fasilita ba alin sira" tenik Sekretáriu Estadu SEFOPE iha salaun Tokodede Liquiça.

Sekretáriu Estadu akresenta katak, formandu sira nafatin buka oportunidade aprende iha area sira ne'ebé mak relevante ho merkadu nia presiza.

"Entaun husi sertifikadu ne'ebé alin sira hetan, ha'u fiar katak imi sei ba update, atu nune'e bainhira Empregadór sira presiza, imi bele hetan mós oportunidade ba iha Australia inklui Nova Zelândia," dehan Sekretáriu Estadu.

Sekretáriu Estadu SEFOPE mós husu ba formandu sira, nafatin buka formasaun sira seluk ne'ebé mak revelante ho empregadór rai liur sira nian hakarak, atu nune'e bele haforsa sira nia profile ne'ebé mak kandidatu sira iha bainhira empregadór sira halo selesaun ba dokumentu sira.