Malang, 5 Outubru 2026: Ministériu Ensinu Superiór, Siénsia no Kultura (MESSK) Timor-Leste estabelese kooperasaun estratéjika ho Universitas Brawijaya (UB), Malang, Jawa Timur, Indonézia, liu-husi asinatura 𝙈𝙚𝙢𝙤𝙧𝙖𝙣𝙙𝙪𝙢 𝙤𝙛 𝙐𝙣𝙙𝙚𝙧𝙨𝙩𝙖𝙣𝙙𝙞𝙣𝙜 (𝙈𝙤𝙐) iha área 𝙏𝙧𝙞 𝘿𝙝𝙖𝙧𝙢𝙖 Ensinu Superiór.

MoU ne’e asina iha Edifísiu Reitoratu Universitas Brawijaya, hosi Vise-Primeiru-Ministru no Ministru Interinu MESSK, Sua Exa. Eng. Mariano Assanami Sabino, no Reitór Universitas Brawijaya, Prof. Widodo.

Kooperasaun ne’e sai hanesan pasu estratéjiku ba MESSK no Universitas Brawijaya atu hametin relasaun no dezenvolve programa sira ne’ebé bele fó benefísiu ba dezenvolvimentu ensinu superiór, siénsia no kapasita rekursu umanu iha Timor-Leste.

Liu-husi akordu ne’e, Universidade Brawijaya sei oferese oportunidade ba estudante no akademísta Timor-Leste, liu-liu iha área bolsa estudu, mobilidade akadémika, joint degree, double degree no peskiza konjunta. Inisiativa sira-ne’e konsidera importante atu hasa’e asesu estudante Timor-Leste ba oportunidade edukasaun no dezenvolvimentu akadémiku iha nivel internasionál.

Iha okaziaun ne’e, Sua Exa. Vise-Primeiru-Ministru no Ministru Interinu MESSK, Eng. Mariano Assanami Sabino, hato’o apresiasaun no agradesimentu ba Universitas Brawijaya ba kompromisu no vontade atu haforsa kooperasaun ho Timor-Leste, liu-liu iha área ensinu superiór.

Sua Exa. mós subliña katak asinatura MoU ne’e la’ós de’it sai dokumentu kooperasaun, maibé tenki tradús ba programa no atividade konkretu ne’ebé bele implementa iha tempu badak. ho nune’e, Sua Exa. enfatiza nesesidade atu estabelese ekipa téknika konjunta ne’ebé bele prepara ajuendamentu no programa servisu ne’ebé klaru, hodi garante katak pontu sira ne’ebé konkorda ona bele implementa ho lalais no efetivu.

MESSK konsidera kooperasaun ho Universitas Brawijaya ne’e nu’udar parte husi esforsu Governu Timor-Leste atu haforsa parséria internasionál iha área ensinu superiór, siénsia no peskiza, no haburas oportunidade ba estudante no akademísta Timor-Leste atu dezenvolve sira-nia kompeténsia no kapasidade.

Kooperasaun ida-ne’e espera bele sai plataforma importante ida atu promove mobilidade akademika, bolsa estudu, peskiza konjunta no transferénsia koñesimentu, hodi kontribui ba dezenvolvimentu rekursu umanu no dezenvolvimentu sustentável iha Timor-Leste.

https://mescc.gov.tl/.../messk-no-universitas-brawijaya.../

See less