Díli, 12 Outubru 2026|| 𝐒𝐮𝐚 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬 𝐄𝐧𝐠. 𝐅𝐞𝐫𝐧𝐚𝐧𝐝𝐢𝐧𝐨 𝐕𝐢𝐞𝐢𝐫𝐚 𝐝𝐚 𝐂𝐨𝐬𝐭𝐚, 𝐒.𝐇𝐮𝐭,hala'o enkontru harmonizasaun ho instituisaun sira husi liña ministérial, hodi koordena no buka solusaun hamutuk kona-ba atividade ateru ne'ebé Kompañia Haksolok Unipesoal.Lda, hala'o iha área Masin Tibar, ne'ebé deskonfia kauza estragu ba ai-parapa no ekosistema naturál sira iha área refere.

𝐒𝐮𝐚 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬, Informa enkontru ne'e nia objetivu mak atu hametin koordenasaun servisu interministérial, avalia impaktu atividade Kompañia Haksolok ne'ebé ateru rai iha área tasi-ibun Masin Tibar nian ba ambiente, no buka medida apropriada atu proteje no konserva ekosistema iha área protejida Masin Tibar.

Iha nia intervensaun, Sua ExcelénsiaSecretário de Estado das Florestas Eng. Fernandino Vieira da Costa S.Hut, hato'o preokupasaun kona-ba atividade ateru ne'ebé Kompañia Haksolok hala'o iha área protejida Masin Tibar, liuliu tanba atividade ne'e iha potensiál atu estraga ai-parapa no ameasa ekosistema naturál sira ne'ebé moris iha área refere.

Nia enfatiza katak instituisaun governu hotu-hotu ne'ebé iha responsabilidade relevante presiza servisu hamutuk, halo monitorizasaun no avaliasaun ba atividade ne'e, no asegura katak atividade dezenvolvimentu hala'o tuir regra no regulamentu floresta no ambientál ne'ebé vigora iha Timor-Leste.

Aleinde ne'e, enkontru harmonizasaun ne'e sai nu'udar plataforma importante atu fahe informasaun, klarifika responsabilidade instituisionál no determina medida konjunta hodi prevene estragu ambientál no asegura konservasaun rekursu naturál sira iha Masin Tibar.

Proteje ai-parapa no ekosistema iha Masin Tibar mak responsabilidade hamutuk hodi asegura ambiente saudavel ba jerasaun ohin no futuru.

Enkontru ne'e partisipa husi Sua Excelência SEF, S.E. Prezidente Autoridade Munisípiu Liquiça (PAM), Autoridade Nasionál Lisensiamentu Ambientál (ANLA, I.P.), Partisipa mós husi Minitério STATAL, Sekretariadu Estadu Asuntu Toponímia no Organizasaun Urbana (SEATOU), Timor Port, Ministériu Turizmu no Ambiente (MTA), Xefe Suku Tibar, Partisipa mós Diretór Gerál, Diretór Nasional, Xefe Departamentu sira inklui Funsionáriu Tekniku sira iha Diresaun Gerál Floresta.