Nahareca, loron 13 Outubru 2026

Ministru Planeamentu no Investimentu Estratéjiku (MPIE) husi IX Governu Konstitusionál, Eng.Gastão Francisco de Sousa, entrega ofisialmente Salaun Residensiál Estasaun Misionária Nossa Senhora Imaculada Coração de Maria Nahareca bá Sarani Nahareca.

Serimónia entrega ne'e akompaña husi Bispu Dioseze Baucau, Dom Leandro Maria Alves, ne'ebé fó bensaun bá edifísiu foun ne'e no administra Sakramentu Krisma bá krismandu sira.

Konstrusaun bá salaun foun ne'e hetan tulun husi IX Governu liuhusi Gabinete Ministru Planeamentu no Investimentu Estratéjiku. Objetivu prinsipál mak atu fasilita atividade igreja nian, enkontru, pastorál, formasaun no sai mós fatin bá atividade sosiál nian.

Iha ninia diskursu entrega, Ministru Gastão Francisco de Sousa hateten katak Governu komprometidu atu apoiu komunidade liuhusi infraestrutura ne'ebé fó benefísiu direta bá povu, liu-liu bá fatin halibur malu, formasaun no atividade sosiál.

Iha omilia, Dom Leandro subliña katak salaun ne'ebé entrega husi Governu ne'e labele sai de'it edifísiu mamuk ida, maibé sai nu'udar fatin halibur malu nian ne'ebé espresa unidade, diálogu no haksolok.

Dom Leandro fó hanoin mós bá krismandu foun sira katak, simu Espíritu Santu lori responsabilidade nu'udar ema ne'ebé adultu iha fiar no kontinua sai sasin fiar nian liuhusi hahalok domin, haraik-an, fó liman bá malu, perdua malu no hases-an husi hahalok violénsia nian, hodi bele moris iha pás no lori dezenvolvimentu bá rai ida ne'e.

Iha biban ne'e, Bispu mós sita ensíklika foun husi Papa Leão XIV, _Magnifica Humanitas_, hodi dehan katak "naran seluk husi pás mak dezenvolvimentu".

Iha biban hanesan, Pe. Residensiál Nahareca, Pe. João Paulo, hato'o agradecimentu boot bá Governu liuhusi Ministru MPIE, Eng.Gastão Francisco de Sousa no bá Bispu Dioseze Baucau, ne'ebé fó ona apoiu boot to'o obra ne'e konklui ho susesu.

“Ami sarani Nahareca nafatin iha esperansa, esperansa ne'ebé hakerek ho fiar, esperansa ne'ebé fanun iha orasaun hamutuk ho Ami mahein Nossa Senhora do Imaculado Coração de Maria. Ami fiar ho esperansa katak uma Maromak nian mós sei sai furak liu tan. Ohin mehi ne'e sai realidade, maibé realidade foun ida ne'e lori mós responsabilidade boot bá ita hotu atu tau matan no kuidadu," dehan Pe. João Paulo.

Serimónia ne'e partisipa mós husi reprezentante husi Ajénsia Nasionál Dezenvolvimentu (ADN), Diresaun Infrastrutura no Irrigasaun, Autoridade Nasionál Petróleu (ANP), Autoridade Munisípiu, Autoridade Postu no Suku, Komandante PNTL Esquadra Ossu, hamutuk ho komunidade no sarani hotu husi Suku Nahareca.

https://sdi.gov.tl/ministerio/presrealease/create

Média MPIE