DILI, 25 Setembru 2025 – Prezidente Repúblika, José Ramos Horta, hala’o audiénsia ho Ministru Juventude, Desportu, Arte no Kultura (MJDAK), Nelyo Isaac Sarmento, iha Palásiu Prezidensia Repúblika, Aitarak-Laran, hodi rona kona-ba preparasaun Dili International Marathon 2025.

Hafoin reuniaun ne’e, Ministru Nelyo Isaac Sarmento informa ba públiku katak Dili International Marathon ne’e hanesan inisiativa ida hosi Prezidente Repúblika, ho tema prinsipál "Halai ba Palestina" (Run For Palestine). Objetivu mak atu hato’o Timor-Leste nia solidariedade ba vítima sira iha Gaza no fó mensajen katak problema hotu iha mundu tenke rezolve liuhusi diálogu.

"Ida ne'e hanesan oportunidade ida atu fó mensajen ba mundu katak, iha Timor-Leste, ami-nia vizaun katak problemas hotu tenke rezolve liuhusi dalan dame no diálogu," dehan Ministru Nelyo Isaac.

Ministru esplika katak eventu ne’e sei hala’o iha loron 11 fulan Outubru, maibé atividade sira sei hahú kedas iha loron 9 to’o 11 fulan Outubru. Iha tempu ne’e, sei iha programa kulturál no ezpozisaun ne’ebé fó oportunidade ba doadór sira atu halo sira-nia feira. Sei iha mós kompetisaun kulinária husi nasaun ASEAN ho tema "Tein ba Páz" (Cooking for Peace), inklui tein gastronómia tradisionál, no promosaun saúde desportu tradisionál.

Dili International Marathon mós iha ambitu ida atu promove Timor-Leste nia adezaun ba ASEAN, ne’ebé hanesan mós objetivu prinsipal ida husi Prezidente Repúblika.

Tuir orariu, kompetisaun halai ne’e sei hahú iha loron 11 Outubru, tuku 05:00 OTL. Ministru informa katak rejistrasaun kontinua loke ba modalidade sira hanesan Full Marathon 42 KM, Meia Marathon 21 KM, Paralímpiku 10 KM, no Halai Saudavél 3 KM. Atividade ne’e involve mós kolaborasaun hosi instituisaun governu seluk hanesan MENEC, MS, MCI, SEKOMS, PNTL, no F-FDTL.

#DiliInternationalMarathon2025 #RunForPalestine #Solidariedade #DiáloguBaDame #TimorLeste #MJDAK #MídiaMJDAK