Asuntu : 𝗞𝗠 𝗔𝗣𝗥𝗢𝗩𝗔 𝗣𝗥𝗢𝗝𝗘𝗧𝗨 𝗥𝗘𝗭𝗢𝗟𝗨𝗦𝗔𝗨𝗡 𝗚𝗢𝗩𝗘𝗥𝗡𝗨 𝗡𝗘’𝗘𝗕É 𝗔𝗣𝗥𝗘𝗭𝗘𝗡𝗧𝗔 𝗛𝗢𝗦𝗜 𝗠𝗙 Díli-kinta, 25/09/2025, S.E. Ministra Finansas, Sra. Santina José Rodrigues F. Viegas Cardoso, ne’ebé aprezenta projeitu rezolusaun governu ba konsellu ministru hetan ona aprovasaun, kona-ba Repúblika Demokrátika Timor-Leste atu adere ba Parseria Governu Abertu (Open Government Partnership – OGP), sorumutu ne’e hala’o iha Palásiu Governu, Díli. Parseria ba Governu Abertu hanesan inisiativa internasionál ida, ne’ebé halibur país liu 75 no entidade governasaun lokál atus ba atus, ne’ebé atu promove transparénsia, prestasaun kontas, inkluzaun no partisipasaun sidadaun nian iha prátika governasaun, hodi haburas sosiedade ida ne’ebé reziliente no prósperu liután. Ho adezaun ba inisiativa ida-ne’e, Timor-Leste kompromete atu kumpri rekezitus, padroins no prátika internasionál sira ne’ebé di’ak ne’ebé estabelese hosi Parseria, hodi hametin transparénsia, kombate korrupsaun no partisipasaun ativu hosi sosiedade sivíl no parseiru sira seluk iha prosesu foti desizaun públika. Rezolusaun ne’e determina katak Ministériu Finansas asume lideransa iha prosesu adezaun no implementasaun Parseria ba Governu Abertu, sai hanesan responsável atu hato’o formalmente dokumentu sira ne’ebé presiza, estabelese mekanizmu diálogu multisetoriál no koordena elaborasaun Planu Asaun Nasionál Governu Abertu nian, ho envolvimentu hosi liña ministeriál no parseiru relevante sira. Ministériu Finansas tenke hato’o ba Konsellu Ministrus, iha prazu loron 90 hafoin publikasaun rezolusaun ida-ne’e, relatóriu preliminár ida kona-ba estatutu adezaun nian no pasu sira tuirmai hodi formula Planu Asaun Iha ambitu konsellu ministru ne’e, lidera husi sua exélensia Primeiru-Ministru Kay Rala Xanana Gusmão, Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay no Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino inklui membru governu sira hotu. #Foto: #Ekipa #Media #Ofisiál #MinistériuFinansas, #AsesuHusi #Portál #Governu #Timor-Leste nian Link: https://www.facebook.com/share/p/17EgxQXh1v/
Data Publica : 26 Sep 2025
Descrisaun :
