Dili, 19 Outubru 2026 – Sua Eselénsia Sekretária Estadu ba Igualdade (SEI), Sra. Elvina Sousa Carvalho, akompaña husi Asesora Téknika Administrasaun no Finansas Gabinete SEI, Sra. Jacinta Abu Cau Pereira, simu audiénsia husi ekipa delegasaun Organizasaun Popular da Mulher Timor (OPMT) iha Sala Enkontru Gabinete SEI, Caicoli, Dili.

Ekipa delegasaun OPMT kompostu husi Sra. Judite Dias Ximenes no Sra. Josefina Pereira, hodi reprezenta estrutura OPMT, realiza enkontru kortejia ho Sua Eselénsia Sekretária Estadu ba Igualdade ho objetivu atu kria koordenasaun no hametin kolaborasaun servisu hamutuk entre OPMT ho SEI, relasiona ho preparasaun komemorasaun Loron Nasionál Feto Timor-Leste ba dala-50 iha tinan ne'e.

Iha hasoru-malu ne'e, Sua Eselénsia Sekretária Estadu hamutuk ho reprezentante OPMT atualiza informasaun kona-ba selebrasaun Loron Nasionál Feto ne'ebé nakait ho istória luta Eróina Maria Tapó ba libertasaun nasionál. SEI rekoñese katak OPMT no Fretilin maka nu'udar inisiadór ba emansipasaun feto hahú kedas iha tinan 1975. Ho razaun hirak ne'e maka SEI envolve OPMT iha Komisaun Organizadora ba selebrasaun Loron Feto Nasionál ba dala-50.

Komemorasaun ne'e ho atividade oioin sei asegura katak selebrasaun Loron Nasionál Feto tinan ne'e reflete kompromisu hamutuk atu promove igualdade, direitu no justisa, liuhusi valoriza, prezerva no konserva dedikasaun ne'ebé feto sira oferese ona ba luta libertasaun nasionál.

Ekipa OPMT informa mós katak, iha selebrasaun tinan 50 Loron Nasionál Feto Timor-Leste, OPMT sei realiza espozisaun ba livru kapítulu por kapítulu kona-ba istória luta feto Timor-Leste nian, liu-liu veterana sira ne'ebé maioria mai husi Partidu Fretilin, tanba organizasaun OPMT nu'udar organizasaun feminina ne'ebé hahú ona promove no luta ba emansipasaun dezde 1974 no 1975, hahú hala'o atividade formasaun hodi enkoraja feto sira no inan-aman atu husik oan-feto sira envolve-an iha atividade sira.

Nia haklean liután katak, "Eróina Maria Tapó mate ho kilat iha liman".

Iha enkontru Sua Eselénsia Sekretária Estadu ba Igualdade-SEI ho delegasaun OMPT remata ho entrega simbóliku livru "Buibere Hamriik Ukun Rasik-An" husi ekipa OPMT ba Sua Eselénsia Sekretária Estadu ba Igualdade nu'udar dokumentu importante ba prezervasaun istória feto Timor-Leste nian.