Dili, 28 Outubru 2026

Ministru Transportes no Komunikasaun, Eng.Miguel Marques Gonçalves Manetelu konvoka enkontru ho ANATL, AACTL, Waskita Karya, PMC, PMU no Konsultór supervizaun, kona-bá progresu servisu Aeroportu Internasionál Prezidente Nicolau Lobato Comoro Dili.

Enkontru Estratéjiku bá Aselerasaun Progresu Infraestrutura Aeroportu Internasionál Prezidente Nicolau Lobato halo iha edifisiu ANATL, E.P Komoro Dili.

Ministru Manetelu hateten enkontru ida ne’e nudar enkontru da-huluk hafoin nia akompaña Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuady Lay, iha loron 15 Outubru 2026 foin lais ne’e iha jakarta halo enkontru bilaterál ho governu indonézia liuhusi Ministru Industrializasaun Indonézia, Rosan Perkasa Roeslani atuál CEO Danantara.

Iha enkontru foin lais iha Jakarta ho CEO Danantara, Ministru Manetelu husu bá Danantara hanesan jestór bá direitu no aset husi empreza estadu (BUMN) sira iha Indonézia. Atu apoiu kompañia Waskita Karya atu aselera servisu sira iha terenu nune’e bele finaliza tuir kontratu ne’ebé determina ona.

Ministru Manetelu subliña bainhira aeroportu ne’e finaliza iha tinan 2028, ida ne'e sei sai orgullu boot ida bá Timor-Leste tanba Timor-Leste sei sai uma nain bá Simeira ASEAN 2029, aviaun boot sira sei atera iha Aeroportu Internasionál Prezidente Nicolau Lobato Komoro, inklui Aviaun husi Prezidente Amerika, Donald Trump nomos Aviaun ne’ebé tula Prezidente Indonézia, Prabowo Subianto.

Ida ne’e orgullu boot ida bá Waskita nu’udar empreza Indonézia ne’ebé hola parte projetu ne’e. Iha biban ne’e, Ministru Manetelu apela, husu bá entidade no parseiru hotu-hotu ne’ebé involve iha projetu infraestrutura estratéjiku ne’e atu hametin kooperasaun, servisu hamutuk ho mehi ida de'it konklui projetu ho kualidade nomos tuir prazu ne’ebé determina ona.

Enkontru ida-ne'e ho objetivu atu avalia no haree husi besik progresu servisu konstrusaun aeroprotu nia, inklui hakat tuir matadalan no parseiru estratejiku sira hodi garante kualidade no kalendáriu servisu iha terenu.

https://sdi.gov.tl/ministerio/presrealease/create

Média MTK