Dili, 28 Outubru 2026 - Sekretaria Estadu ba Igualdade (SEI), liu husi Diresaun Nasionál Dezenvolvimentu Igualdade Jéneru, hala'o enkontru koordenasaun ho Parseiru sira hanesan UN Women, OXFAM, Sekretaria Estadu Formasaun Politika no Empregu (SEFOPE) no Feto ho Abilidade Timor-Leste (Women With The Ability Timor-Leste) iha salaun Maria Goreti Caicoli, Dili.

Enkontru ne'e partisipa husi SEI, Diretora DNDIJ-SEI Sra. Olga da Costa Monteiro; Xefe Departamentu Empoderamentu Ekonómia-SEI, Sr. Henrique da Silva; Xefe Departamentu Partisipasaun Polítika Sra. Avia Brito de Araujo Costa; Xefe Departamentu Relasaun Públiku no Parseiru Dezenvolvimentu Sr. Hermínio Xavier no akompaña mós husi Asesora Gabineti SEI, Sra. Jacinta Abu Cau Pereira; Asesora SEI, Sra. Paula Maia; no tékniku profisionál sira husi Departamentu Partisipasaun Polítika no Empoderamentu Ekonomia.

Husi parseiru dezenvolvimentu, marka prezensa husi Sra. Lucia Decy F. Martins nu'udar Advocacy Advisor WWCTL,, Sr. Tim Young nu'udar Research Advisor OXFAM no Sr. Lucas Obe nu'udar GEDSI Coordination, husi SEFOPE Sra. Marcelina de Jesus no Sra. Joaquina T. C. Corte-Real, no husi UN Women Sr. Dario Sousa.

Objetivu husi enkontru refere mak hodi Halo koordenasaun no hare'e fila-fali Grupu Traballu nia feedback ba esbosu Enkuadramentu Nasionál ba Asaun kona-ba Ekonomia Kuidadu ne'ebé prepara husi ESCAP; Koordenasaun no preparasaun entre ESCAP-SEI no Grupu Traballu ba Lansamentu Enkuadramentu Nasionál ba Asaun kona-ba Ekonomia Kuidadu nian no planu Preparasaun ba Workshop Caring Cities ne'ebé sei hala'o iha loron 23 - 24 Novembru 2026.

Enkontru ne'e nu’udar pasu importante hodi hametin kolaborasaun entre Governu no Parseiru Dezenvolvimentu sira hodi avansa agenda Ekonomia Kuidadu iha Timor-Leste, nu'udar parte ida husi esforsu ba empoderamentu ekonomia feto no igualdade jéneru iha Timor-Leste.