𝗗𝗶𝗹𝗶, 𝟮𝟵 𝗢𝘂𝘁𝘂𝗯𝗿𝘂 𝟮𝟬𝟮𝟲

Primeiru-Ministru, Kay Rala Xanana Gusmão hamutuk ho Ministru Obras Públikas, Samuel Marçal, ofisialmente lansa Sentru Formasaun OHS (Occupational Health and Safety) iha Ministériu Obras Públikas (MOP), Caicoli, kinta-feira ne'e.

Sentru ne'e sei fó treinamentu hodi hetan lisensiamentu bá joven Timor-oan sira ne'ebé hakarak sai opera ekipamentu pezadu, tuir padraun seguransa no saúde okupasionál.

Objetivu prinsipál husi sentru ne'e mak atu prepara rekursu umanu nasionál ne'ebé kualifikadu, hasa'e kompeténsia téknika joven sira nian no garante operasaun ekipamentu pezadu iha projetu infraestrutura sira hala'o ho seguru, profisionál nomos tuir norma internasionál.

Sentru ne'e, Governu liuhusi MOP hakarak hamenus dependénsia bá operadór estranjeiru, kria oportunidade empregu bá Timor-oan sira no hametin kultura seguransa iha setór obras públikas.

Primeiru-Ministru no Ministru Obras Públikas enkoraja joven sira atu aproveita oportunidade ne'e hodi kontribui bá dezenvolvimentu infraestrutura nasionál.

Partisipa iha serimónia ne'e Vise-Ministru Obras Públikas, Júlio do Carmo da Silva, Sekretáriu Estadu Eletrisidade, Bee no Saneamentu, Santos Noronha, Sekretáriu Estadu Protesaun Sivíl, Domingos Mariano Reis, Xefe Komisaun E Parlamentu Nasionál, Deputadu Marcos Xavier, Segundu Komandante-Jerál PNTL, Komisária Asistente Polísia Natércia Eufrásia Soares Martins, Prezidente IGE-ADI, Ana Paula da Cruz, no reprezentante JICA iha Timor-Leste.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*