Dili, 06 Novembru 2026______Sekretaria Estadu ba Igualdade (SEI) ohin, iha Sentru Konvensaun Dili (CCD), realiza abertura ba Esposizaun Produtu Grupu Feto sira hosi Munisípiu 12 inklui Rejiaun Administrativa Espesiál Oe-Cusse Ambeno (RAEOA), iha âmbitu komemorasaun Loron Nasionál Feto ba dala-50 iha Timor-Leste.

Esposizaun ne’e abertura husi Sua Exelénsia Ministra Solidariedade Sosiál no Inkluzaun no Interina Sekretária Estadu ba Igualdade, Sra. Verónica das Dores, akompaña husi Vise-Prezidente Komisaun Organizadora ne'ebé nu'udar mós Diretór-Jerál SEI, Sr. Armando da Costa, Inspetora no Auditoria SEI, Sra. Benigna Maria Amaral, Xefe Gabinete SEI, Sra. Srilia Tilman Cardoso, Dirijente SEI sira, no parseiru dezenvolvimentu sira.

Objetivu hosi Esposizaun ne’e mak atu promove no valoriza produtu lokál sira ne'ebé prodús hosi grupu feto sira hosi munisípiu hotu-hotu.

Iha diskursu abertura, Sua Exelénsia Ministra Verónica das Dores hato'o apresiasaun no respeitu klean ba grupu feto sira hotu ne'ebé mai hosi komunidade no munisípiu oioin hodi hatudu produtu, kreatividade, abilidade no esforsu ne'ebé feto sira halo loroloron.

Tuir Sua Exelénsia, esposizaun ida-ne'e la'ós de'it fatin atu hatudu no fa'an produtu, maibé sai mós espasu atu rekoñese feto sira-nia kontribuisaun ba ekonomia família no nasaun nian; atu hametin ligasaun entre produtu, merkadu no konsumidor; no atu hatudu katak bainhira feto hetan oportunidade, rekursu no apoiu, sira bele kria rendimentu, empregu no prospetiva foun ba sira-nia família.

“Ha'u hato'o parabéns ba grupu sira ne'ebé prodús no promove produtu lokál, inklui produtu agríkola, ai-han prosesadu, artezanatu, kostura, kriasaun tradisionál no atividade negósiu ki'ik seluk. Iha produtu ida-idak, ita haree feto sira-nia koñesimentu, inovasaun, dedikasaun no kapasidade atu transforma rekursu lokál sai valór ekonómiku,” dehan Sua Exelénsia.

Ministra subliña mós katak Governu, liuhosi SEI, reafirma kompromisu atu kontinua suporta no promove grupu feto sira, liuliu feto rurál no grupu vulnerável sira, hodi haforsa ekonomia uma-laran.

Suporta ne'e presiza la'ós de'it osan, maibé mós formasaun, akompañamentu tékniku, literasia finanseira, jestaun negósiu, asesu ba merkadu no oportunidade atu feto sira partisipa iha prosesu foti-desizaun, tuir kompromisu Deklarasaun Maubisse Faze Daruak, períodu 2023-2028, ne'ebé hametin kompromisu Governu ho liña ministeriál no BNCTL atu promove moris-di'ak no empoderamentu sósiu-ekonómiku feto rurál.

Deklarasaun ne'e husu atu polítika no programa sira tradús ba asaun konkreta, ho koordenasaun, orsamentu adekuadu no monitorizasaun, ho objetivu atu asegura katak feto rurál, inklui feto ho defisiénsia, bele asesu ba rekursu, formasaun, oportunidade ekonómika no merkadu, no la husik ema ida iha kotuk.

Sua Exelénsia hatutan katak empoderamentu ekonómiku feto iha ligasaun direta ho prevensaun violénsia doméstika no violénsia bazeia ba jéneru. Bainhira feto iha rendimentu, asesu ba rekursu no kapasidade atu foti-desizaun, sira bele hametin autonomia no seguransa ekonómika.

Iha nia mensajen enkorajamentu, Ministra husu ba feto sira hotu ne'ebé partisipa atu kontinua dezenvolve produtu lokál ho kualidade, fó atensaun ba embalajen no marka, buka merkadu foun no fahe esperiénsia ho grupu seluk, tanba produtu lokál nu'udar patrimóniu no potensialidade ekonómika Timor-Leste nian.

Esposizaun ne'ebé organiza husi SEI ne'e partisipa husi grupu feto sira hosi munisípiu sira, inklui grupu artezanatu no grupu hortikultura hosi Munisípiu Aileu.