𝗗Í𝗟𝗜, 𝗠𝗝 — 𝗞𝘂𝗮𝗿𝘁𝗮-𝗳𝗲𝗶𝗿𝗮, 𝟰 𝗱𝗲 𝗻𝗼𝘃𝗲𝗺𝗯𝗿𝘂 𝗱𝗲 𝟮𝟬𝟮𝟲, Ministru da Justisa, Dr. Sérgio de Jesus Fernandes da Costa Hornai, lidera reuniaun Konsellu Konsultivu, ne’ebé hala’o iha Ministériu da Justisa, ho objetivu atu halo preparasaun no análize kle’an kona-ba asuntu sira ne’ebé sai matéria diskusaun iha Komisaun A Parlamentu Nasionál, molok hakat ba prosesu diskusaun no aprovasaun Orsamentu Jerál Estadu (OJE) ba tinan fiskál 2027.

Iha reuniaun ne’e, Ministru Justisa, hamutuk ho membru Konsellu Konsultivu no dirijente sira hosi diresaun tuteladu sira, halo avaliasaun ba prioridade institusionál, programa, atividade no planu orsamentál Ministériu da Justisa ba tinan fiskál 2027. Diskusaun ne’e mós fó atensaun espesiál ba identifikasaun asuntu estratéjiku sira ne’ebé presiza hetan esklaresementu, inklui alokasaun orsamentál, implementasaun programa no rezultadu ne’ebé Ministériu da Justisa atinje ona.

Liu hosi reuniaun Konsellu Konsultivu ne’e, Ministériu da Justisa buka asegura preparasaun ne’ebé di’ak, koordenada no integrada entre entidade no servisu relevante sira, hodi bele identifika no klarifika asuntu prinsipál sira, nune’e mós prepara resposta no esklaresementu adekuadu ba preokupasaun sira ne’ebé Parlamentu Nasionál bele hato’o durante prosesu análize no diskusaun orsamentál.

Ministériu Justisa reafirma kompromisu sei kontinua hadi’a kualidade servisu públiku iha setór justisa, liuhosi implementasaun programa no atividade sira ne’ebé orienta ba hametin sistema justisa, konsolida Estadu Direitu no asegura asesu ba justisa ne’ebé justu no ekitativu ba sidadaun hotu.