𝟎𝟗 𝐍𝐨𝐯𝐞𝐦𝐛𝐫𝐮 𝟐𝟎𝟐𝟔

==============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, partisipa iha debate Proposta Lei Nú. 33/VI Orsamentu Jerál Estadu tinan fiskál 2027 iha faze jeneralidade, ne’ebé hahú iha Parlamentu Nasionál, Segunda, 9 Novembru 2026.

Debate ne’e marka inísiu diskusaun entre Parlamentu Nasionál no Governu kona-bá proposta OJE 2027, hodi fó oportunidade ba deputadu sira atu analiza no diskute polítika, programa no prioridade Governu nian, liuliu kona-bá alokasaun orsamentu ba setór sira ne’ebé konsidera importante ba dezenvolvimentu nasionál.

Proposta OJE 2027, ho montante billiaun US$ 2.57 aprova ona husi Konsellu Ministru iha 30 Setembru 2026, no sai matéria prinsipál iha debate ne’e.

Orsamentu 2027 iha lema “Reforsa Reziliénsia liuhosi Transformasaun: Diversifika Ekonomia ba Futuru ida ne’ebé Sustentável”, ne’ebé tau kompromisu Governu nian atu hametin reziliénsia ekonómika, promove diversifikasaun ekonomia no asegura dezenvolvimentu sustentável iha Timor-Leste.

Hafoin jeneralidade ne'ebé sei debate loron tolu, 9 to'o 11, debate OJE 2027 sei kontinua iha espesialidade, ne’ebé sei hahú iha 24 Novembru 2026 no kontinua to’o prosesu debate no aprovasaun remata.

See less