DÍLI, 05 NOVEMBRU 2026 – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho Ministru Obras Públikas (MOP), Samuel Marçal, akompaña husi Ekipa Téknika MOP no kompañia implementadora, ohin kinta-feira, hahú halo despezu administrativu hodi konstrui infraestrutura rotunda foun iha área Ponte Maufelu, Suku Becora, Postu Administrativu Cristo Rei, Munisípiu Díli.

Sekretáriu Estadu SEATOU hateten, prezensa ekipa konjunta nian ohin mai halo servisu no apoiu hodi muda komunidade afetadu sira-nia sasán molok hala’o despezu administrativu. Komunidade ne'ebé afeta direta husi projetu modernizasaun infraestrutura rotunda boot iha Ponte Maufelu ne'e hamutuk uma-kain sanulu-resin-hitu (17).

SEATOU haktuir tan katak, konstrusaun rotunda foun no alargamentu estrada iha Ponte Maufelu ne'ebé implementa husi Ministériu Obras Públikas (MOP) ne'e, iha objetivu atu jere tráfiku ho seguru no fasilita movimentu veíkulu sira iha sidade Díli, liliu área Becora no Kuluhun.

“SEATOU mós fó agradesimentu boot ba uma-kain 17 ne’ebé hatudu kooperasaun di'ak ba dezenvolvimentu ne'e. Kona-ba preokupasaun komunidade nian ba indemnizasaun, nia mós dehan katak Ministériu Obras Públikas sei trata asuntu ne’e ho di'ak, nune’e bele garante no proteje afetadu sira-nia diretu”