𝐃𝐮𝐧𝐠𝐚𝐧𝐧𝐨𝐧, 𝟎𝟕 𝐍𝐨𝐯e𝐦𝐞𝐛𝐫𝐮 𝟐𝟎𝟐𝟔

Sekretáriu Estadu ba Dezenvolvimentu Lokál (SEDL), Mateus W. dos Santos Tallo, hamutuk ho Kónsul-Jerál Repúblika Demokrátika Timor-Leste iha Belfast, Abreu Ximenes Correia, Diretora Nasionál ba Jestaun Baze de Dadus, Túlia Onorina A. de Jesus; no Prezidente TAIS-NI, Francisco Guterres, partisipa iha atividade sosializasaun kona-ba Resenseamentu Eleitorál no Atualizasaun Baze de Dadus Biométriku ba komunidade Timoroan iha Dungannon, Irlanda Norte, nu’udar parte husi preparasaun ba Eleisaun Prezidensiál 2027.

Atividade ne’e organiza husi Konsuladu-Jerál Timor-Leste iha Belfast, iha kolaborasaun ho ekipa Sekretariadu Tékniku Administrasaun Eleitorál (STAE), ho objetivu atu sensibiliza no informa komunidade Timoroan kona-ba importánsia atu atualiza dadus pesoál no biométriku, hodi asegura rejistu eleitorál ne’ebé loos, kompletu no atualizadu.

Iha atividade ne’e, komunidade Timoroan hetan informasaun no esplikasaun kona-ba prosesu resenseamentu eleitorál, prosedimentu administrativu, rekizitu dokumentu, direitu no dever sidadaun, no mekanizmu atu atualiza dadus eleitorál. Sosializasaun ne’e sai nu’udar meiu atu promove komprensaun no partisipasaun ativa sidadaun Timoroan iha prosesu demokrátiku, inklui sira ne’ebé hela iha rai-li’ur.

Iha okaziaun ne’e, SEDL entrega simbolikamente kartaun eleitorál biométriku foun ba sidadaun eleitor sira. Inisiativa ne’e integra iha esforsu atu aproxima servisu administrasaun eleitorál ba komunidade Timoroan iha diáspora, fasilita asesu ba dokumentasaun eleitorál no hametin partisipasaun sidadaun iha prosesu demokrátiku nasaun nian.

See less