S.E. SEKRETÁRIA ESTADU BA IGUALDADE (SEI) LOKÉ FÓRUM DIÁLOGU NASIONÁL KONA-BA HAMETIN FETO NIA FIAR-AN NO KAPASIDADE EKONÓMIKA BA FUTURU NE'EBÉ NABILAN

20 Nov 2026
Press Release Image
Asuntu

S.E. SEKRETÁRIA ESTADU BA IGUALDADE (SEI) LOKÉ FÓRUM DIÁLOGU NASIONÁL KONA-BA HAMETIN FETO NIA FIAR-AN NO KAPASIDADE EKONÓMIKA BA FUTURU NE'EBÉ NABILAN

Data Publica

20 Nov 2026

Descrisaun

Dili, 19 Novembru 2026 — Sua Exelénsia Sekretária Estadu ba Igualdade (SEI), Elvina Sousa Carvalho, iha loron 19 fulan Novembru tinan 2026, halo abertura ba Fórum Diálogu Nasionál ne'ebé organiza husi ONG Ba Futuru, liuhusi projetu ho naran "Proteje Feto no Labarik, Dezenvolvimentu Ekonomia, Promosaun Dame no Demokrasia" (PROFEDADE), ne'ebé hala'o iha Salaun Tower, Fatuhada-Dili.

Fórum Nasionál ne'e realiza ho tema "Hametin Feto nia Fiar-an no Kapasidade Ekonómika ba Futuru ne'ebé Nabilan".

Fórum Nasionál ne'e nu'udar atividade ida husi projetu ne'ebé Ekipa ONG Ba Futuru hamutuk ho Ekipa PROFEDADE realiza, ho objetivu atu fahe no hetan esperiénsia inovativu hodi enkoraja feto sira seluk iha vida negósiu hodi hasa'e rendimentu família; hasa'e no hametin liután interese inan-feton nia atividade grupu rai no empresta osan; hametin ligasaun feto sira husi Munisípiu Covalima no Munisípiu Ermera, ne'ebé realiza ona ho di'ak sira-nia planu asaun negósiu no harii grupu; no hakbiit feto sira-nia fiar-an atu foti desizaun ba ekonomia família.

Iha ninia diskursu, Sua Exelénsia Sekretária Estadu ba Igualdade-SEI hateten, Fórum Diálogu Nasionál ne'e sai nu'udar oportunidade ida ba empoderamentu ekonómiku feto nian, liuliu ba grupu inan-feto sira, hodi eleva koñesimentu no abilidade, oportunidade, esperiénsia inovativu no motivasaun.

Sua Exelénsia mós esplika katak tema ne'e reflete tebes situasaun sira ne'ebé Governu, instituisaun sira, sosiedade sivíl no parseiru dezenvolvimentu sira ne’ebé suporta ona inan feto sira liuhusi programa empoderamentu feto iha Timor-Leste.

Iha diskurs, Sua Exelénsia mós fó apresiasaun ba ekipa ONG Ba Futuru, Autoridade Lokál no Parseiru Dezenvolvimentu sira-nia servisu hodi hakbiit ona inan feto sira iha munisipiu Covalima no Ermera iha promosaun igualdade iha Timor-Leste.

"Ha'u apresia tebes ba Ekipa ONG Ba Futuru nia servisu ne'ebé apoia feto maluk sira atu bele komprende kona-ba igualdade jéneru, hakbiit sira-nia an ekonomikamente atu hetan oportunidade independente hodi sai jestór ba grupu sira ne'ebé iha. Atividade ne'ebé realiza iha Munisípiu rua hanesan Munisípiu Covalima no Munisípiu Ermera, liuliu grupu sira ne'ebé envolve, sei la atinji sira-nia objetivu wainhira laiha apoiu másimu husi Autoridade Lokál," hateten Sua Exelénsia Sekretária Estadu ba Igualdade.

Atu taka, Sua Exelénsia mós informa katak iha tinan ne'e, Governu Timor-Leste liuhusi Sekretaria Estadu ba Igualdade hamutuk ho parseiru sira selebra ona Loron Nasionál Feto bad ala-50 nu'udar loron importante hodi fó valoriza ba eroína sira-nia luta, inklui mós hodi selebra atinjimentu susesu hotu ne'ebé feto sira iha.

Iha fatin hanesan, Diretóra Ezekutiva ONG Ba Futuru, Sra. Judith Maria de Sousa, esplika katak projetu ONG Ba Futuru ho naran "Proteje Feto no Labarik, Dezenvolvimentu Ekonomia, Promosaun Dame no Demokrasia" (PROFEDADE) ne'ebé finansia husi MISEREOR nu'udar doadór primáriu no ko-finansia husi Kindermission, ba tinan 3, sura husi fulan Janeiru 2021 to'o fulan Janeiru tinan 2024, lidera diretamente husi Ba Futuru hodi implementa programa iha Munisípiu Covalima no Munisípiu Ermera ba maluk feto no joven feto ne'ebé hala'o sira-nia profisaun hanesan negosiante, nomós sira ne'ebé iha interese atu hala'o atividade negósiu.

Projetu ne'e fasilita formasaun kona-ba Haforsa Ekonomia Feto, Rezolusaun Konflitu, Prevensaun Violénsia Bazeia ba Jéneru, Rai no Empresta Osan, realiza Fórum Nivel Munisipál no Fórum Nasionál, Dixiplina Pozitivu no Protesaun ba Labarik ba benefisiáriu sira-nia parseiru, no Abilidade Teatru ba labarik ka oan husi benefisiáriu sira, nomós halo showcase.

Aleinde ne'e, liuhusi projetu ida ne'e, Ba Futuru ho ninia ekipa ne'ebé servisu direita iha projetu ne'e, fornese mós suporta ba feto ne'ebé estabelese sira-nia grupu no negosiante individuál sira liuhusi kontribui ideia no revee progresu husi sira-nia planu asaun ne'ebé trasa ona, nu'udar atividade ida hafoin sira remata formasaun ligadu ho tópiku ne'ebé mensiona.

Tan ne'e, Diretóra informa katak ONG Ba Futuru ho ninia ekipa projetu PROFEDADE organiza Fórum Nasionál ho tema "Hametin Feto nia Fiar-an no Kapasidade Ekonómika ba Futuru ne'ebé Nabilan". Fórum Nasionál ne'e nu'udar atividade ida husi projetu ne'ebé ekipa projetu servisu dadaun.

Iha Fórum Nasionál ne'e, Ba Futuru konvida oradór importante sira hanesan Asesór Tékniku no Koordenadór Asuntu Esternal (SECoop), Sr. Leovogildo Belarmino; Diretór Ezekutivu IADE, Sr. Filomeno Marcelino Belo; no mós Benefisiáriu Ba Futuru, Sra. Natalia de Jesus Araujo, hodi fahe sira-nia matenek no esperiénsia hodi inspira grupu feto no negosiante individu sira atu ativu iha sira-nia negósiu no kooperativa.

Fórum Diálogu Nasionál ne'e partisipa husi inan-feton na'in 60 ne'ebé selesionada, kompostu husi partisipante na'in 30 husi Munisípiu Covalima no na'in 30 husi Munisípiu Ermera, nomós Autoridade Lokál na'in 6.

Galeria
Video

Laiha Video

Dokumentus

Laiha Dokumentus