DILI, 26 Setembru 2025

Konsellu Administrasaun husi Fundu Infraestrutura (KAFI) lidera husi Primeiru-Ministru (PM), Kay Rala Xanana Gusmão hala’o sorumutu iha Ministériu Finansas (MF), Aitarak Laran, sesta (26/09/2025).

Reuniaun ne’e atu debate prioridade sira bá tinan 2026 no prepara Orsamentu Jerál Estadu (OJE) bá tinan 2026.

Sorumutuk ne’ebé Sekretariadu Projetu Boot sira mak organiza, hetan partisipasaun husi membru Governu sira-ne’ebé halo parte iha KAFI, titulár sira husi kargu sira kona-bá área planeamentu, finansas, obras públikas no responsável sira husi Autoridade Nasionál Dezenvolvimentu (ADN), Komisaun Nasionál Aprovizionamentu (KNA) no liña ministeriál sira ne’ebé hala’o hela projetu hirak ne’ebé hetan finansiamentu husi Fundu Infraestrutura (FI).

FI harii iha tinan 2011 no sai nu’udár instrumentu finanseiru ida ne’ebé ninia objetivu atu fó apoiu bá projetu estratéjiku sira hodi reforsa kreximentu ekonómiku Timor-Leste nian, ho fasilita dezenvolvimentu infraestrutura sira no prepara fonte finanseira bá projetu sira kona-bá estrada no ponte, aeroportu no portu marítimu, fornesimentu bee-moos no enerjia, edukasaun no saúde, turizmu no projetu boot sira seluk ne’ebé utiliza orsamentu boot liu dolar amerikanu millaun ida.

FI ninia sustentabilidade liga diretamente ho prioridade estratéjiku sira kona-bá dezenvolvimentu ekonómiku, impaktu sosiál no ambientál, ne’ebé aliña ho Objetivu sira husi Dezenvolvimentu Sustentável no Planu Estratéjiku Dezenvolvimentu 2011-2030.

Hafoin kriasaun Fundu Infraestrutura naan, Governu harii Konsellu Administrasaun Fundu Infraestrutura (KAFI) nu’udár órgaun ezekutivu ne’ebé iha podér hodi foti desizaun kona-bá matéria hotu-hotu ne’ebé iha relasaun ho projetu sira husi Fundu Infraestrutura.

KAFI fó mós orientasaun polítika bá instituisaun ka liña ministerial, setoriál sira ne’ebé ezekuta fundu ne’e.

Sekretariadu Projetu Boot sira mak sai nu’udár responsável bá apoiu tékniku no administrativu bá KAFI, liu-husi koordenasaun direta ho ADN, KNA no liña ministeriál sira.

Sekretariadu ne’e mós assume responsabilidade atu halo avaliasaun no estudu kona-bá viabilidade projetu sira, fó rekomendasaun sira kona-bá disponibilidade orsamentu no mós opsaun sira finansiamentu no ezekuta pagamentu sira tuir rekomendasaun hosi ADN.

(Mídia-Mop)