Nova Iorke, 25 fulan-setembru tinan 2025__Iha sorumutuk plenária nivel aas hodi komemora aniversáriu ba dala 30 husi Programa Asaun Mundial ba Juventude "Programa Asaun Mundial ba Foin-sa’e iha idade tinan 30: Aselera Progresu Globál liuhusi Kolaborasaun Interjerasionál” Sua Exelénsia Sekretária Estadu ba Igualdade, Sra. Elvina Sousa Carvalho reafirma Timor-Leste nia kompromisu forte atu asegura partisipasaun nakonu foin-sa’e sira iha nivel nasionál, rejionál no Globál. Ho foin-sa'e sira ne'ebé kompostu husi liu metade husi populasaun, sira konsidera hanesan airin ba demokrasia, pás no dezenvolvimentu iha futuru.

Konstituisaun Timor-Leste garante promosaun, edukasaun, saúde no formasaun profisionál ba foin-sa'e sira, no mós asegura sira-nia envolvimentu iha unidade, rekonstrusaun, defeza no dezenvolvimentu. Partisipasaun ne'ebé signifikativu tenke inkluzivu - fó kbiit ba joven feto, joven rurál sira, ema ho defisiénsia sira, no grupu marjinalizadu sira - no institusionalizadu iha kuadru lei, polítika, orsamentu no governasaun nian laran. Aprosimasaun ida-ne'e asegura katak lian foin-sa'e sira influénsia desizaun sira ho impaktu ba tempu naruk, hahú husi asaun klimátika to'o transformasaun dijitál no harii dame.

Atu konkretiza kompromisu hirak-ne'e, Timor-Leste estabelese ona plataforma no programa oioin ba envolvimentu juventude, inklui konsellu nasionál sira, reprezentasaun parlamentár, formasaun vokasionál, inisiativa sosiedade sivíl, no sentru foin-sa'e sira iha munisípiu hotu-hotu. Investimentu iha foin-sa'e sira la'ós opsaun maibé esensiál - transforma partisipasaun foin-sa'e sira husi jestu temporáriu ida ba movimentu ne’ebé sustentavel iha justisa, igualdade no solidariedade interjerasionál iha mundu tomak.

**************************************