DILI 26 SEPTEMBER 2025

Vise-Ministra Solidariedade Sosiál no Inkluzaun, Céu Brites hala’o abertura ba konferénsia nasionál kona-ba direitu Ema ho Defisiénsia-EhD no dezenvolvimentu inkluzivu ho Tema “Hamutuk ita harii Forsa ba Advokasia Direitu Ema ho Defisiénsia, liu husi fahe ita nia knaar no Responsabilidade sira ba Kontinuasaun Dezenvolvimentu ne’ebé Inkluzivu iha Timor-Leste”, iha Salaun João Paulo (JP) Comoro, Díli, Timor-Leste, Sesta-Feira (26/09/2025).

Objetivu husi konferénsia nasionál ne'e atu promove no reforsa direitu sira Ema ho Defisiénsia, ho baze ba prinsípiu inkluzaun, igualdade, no partisipasaun plena iha dezenvolvimentu nasionál.

Iha abertura Vise-Ministra MSSI hatete “Liuhosi MSSI, Ha'u Hakarak fó sasin katak, atu la husik ema ida iha kotuk, hahú hosi pasu inisiál ne’ebé simples kria oportunidade no ambiente ba partisipasaun no involvimentu ba Ema ho Defisiénsia. Ambiente ne’e tenki seguru ba partisipasaun, oportunidade atu kontribui ideias, maski la perfeitu no fornese mentoring ka apoiu ba kapasitasaun. Partisipasaun sira ne’e la'ós dala ida de'it, maibé tenki hola parte iha prosesu hosi planeamentu, implementasaun to'o avaliasaun sira. Ha'u hakarak fó hanoin fali ita hotu, kona-ba Prosesu dezenvolvimentu Planu Asaun Nasionál (PAN) ba Ema ho Defisiénsia 2021-2030.

Imi barak iha ne’e, hola parte hosi prosesu inísiu iha 2019 to'o finaliza no aprovasaun iha Konselhu Ministru no kontinua involve hodi monitoriza PAN ida ne’e ninia implementasaun. Mekanizmu Dezenvolvimentu PAN-EhD 2021-2030 ne’e hetan rekonsimentu Nasionál nu'udar prosesu ida ne’ebé partisipatóriu no Inkluzivu tebes”.

Eventu ne’e organiza husi Community-Based Rehabilitation Network Timor-Leste (CBRN-TL).

Mídia MSSI