Dili, 26 Setembru– Secretariu Estadu Formasaun Profisionál no Empregu (SEFOPE), liuhusi Xefe Gabinete Sr. Jacinto Ribeiro Dias, hamutuk ho reprezentante (DFAT), marka momentu importante ho enserramentu formasaun literasia finanseira no relasaun saudável ba kandidatu traballadór PALM nain 19 no sira-nia família liu husi Projeitu Scale up.

Inisiativa ne'e ninia objektivu prinsipál atu fortalese traballadór migrante Timor-oan sira ho koñesimentu prátiku no abilidade ne'ebe bele sai hanesan alicerse ba sira-nia susesu iha rai-li'ur, iha momentu hanesan ajuda promove sira harmonozasaun iha relasaun família .

Iha nia diskursu, Xefe Gabinete hateten: "Ha'u enkoraja partisipante sira hotu-hotu, bainhira ita hetan oportunidade atu servisu iha rai-li'ur, tenke hanoin katak ita husik família ba buka osan iha rai liur ho objetivu atu hadia ekonomia iha uma kain bain hira fila mai Timor no mantein nafatin relasaun saudavel bain hira moris no servisu iha rai liur , Chefe Gabinete mos agradese ba DFAT, Care International no parseiru sira ne’ebé organiza formasaun ida ne’e hodi bele sai susesu .

Iha sorin seluk, Sra. Penny Robert, Reprezentante husi DFAT, mos akresenta katak, "Hamutuk ita harii sistema apoiu ida ne'ebé valor boot liu kontratu sira. Sistema ida-ne'ebe fó valór ba moris-di'ak emosionál no sosiál ba traballadóres no sira nia família. Inisiativa ida ne’e hanesan viajen inisiu ida , no ami kontente atu kontinua la'o iha viajen ida-ne'e hamutuk ho Governu Timor-Leste, parseiru implementadores no komunidade sira, iha vizaun ida ne'ebe hanesan.

Partisipante sira mós hatudu satisfasaun boot. "Nu'udar kandidatu PALM, ha'u ho ha'u-nia kaben agradese tebes tanba aprende oinsá atu jere osan família no kria komunikasaun ne'ebé di'ak iha uma laran. Maske hau seidauk ba Austrália, lisaun sira ne'ebe ami simu ona, ami bele hahu aplika iha ami-nia família," hatete Jacinto Rosario, kandidatu traballador PALM.

Inisiativa ida ne’e nia vantajen laos de'it ba traballadór sira, maibé sei fo impaktu sosiál no ekonómiku ba komunidade enjerál. Atividade ida ne’e suporta husi Governu Australia no Timor-Leste, liu husi programa PALM ne’ebé lideradu husi SEFOPE.

Australian Embassy, Timor-Leste