UNPAZ, 25 fulan-setembru tinan 2025__Atu haforsa koñesimentu no prevensaun Violénsia Bazeia ba Jéneru, Asédiu Seksuál no asuntu Igualdade Jéneru iha nivel Universitáriu sira, Sekretaria Estadu ba Igualdade (SEI) hamutuk ho parte Diresaun Estudantil UNPAZ no mós Parseiru ALFeLa, FOKUPERS no TAF-NABILAN hala’o formasaun kona-ba prevensaun VBJ, Asédiu Seksuál no Igualdade Jéneru ba estudante Universitáriu UNPAZ iha UNPAZ-Manleuana Díli.

Formasaun ida-ne’e sei haforsa koñesimentu estudante Universidade sira inklui UNPAZ atu hatene asuntu Igualdade Jéneru, Violénsia Bazeia ba Jéneru no Asédiu Seksuál; fornese estudante universitáriu sira ho koñesimentu, atitude no abilidade atu prevene no responde situasaun diskriminasaun no violénsia; kompriende konseitu báziku, forma sira kona-ba jéneru, igualdade jéneru, asédiu seksuál no violénsia bazeia ba jéneru no estudante sira bele sensivel ba prátika prevensaun iha kampus no motiva estudante sira hodi promove kultura respeitu no igualdade.

Diretór-Jerál SEI, Sr. Armando da Costa iha abertura hatete katak Estadu liuhusi Sekretaria Estadu ba Igualdade (SEI) hamutuk ho Ministériu Ensinu Superiór, Siénsia no Kultura (MESSK) lansa ona programa ida ho naran “Kampus Seguru” iha UNTL depois iha Universidade privadu sira asina ona akordu ho MESSK hodi bele aplika Kampus Seguru.

“Kampus Seguru refere ba ambiente ne’ebé estudante feto no estudante mane, no estudante ida-idak ho nia karáter, ho nia jeitu bele partisipa prosesu edukasaun nian iha eskola sira ho livre inklui universitáriu sira no lahó tauk, lahó ameasa husi parte seluk nune’e mós livre husi esplorasaun sira seluk ne’ebé bele fó vantajen ba ema balu , bele fó vantajen ba grupu balu ne’ebé karik iha liu autoridade iha liu poder atu bele hetan vantajen, bele hetan benefísiu inklui benefísiu ka vantajen seksuál husi ema ida ba ema seluk”, DG Armando hatete.

Formasaun ida-ne’e ho espetasaun atu estudante sira hatene kona-ba definisaun igualdade jéneru, VBJ no asédiu seksuál, lei nasionál no instrumentu internasionál relevante, impaktu violénsia ba vitima, familia no komunidade. Liuhusi formasaun ne’e mós ita hein katak estudante sensível no respeita diferensa jéneru, estudante hetan mudansa atitude kontra diskriminasaun, estereótipo no prejuisu bazeia ba jéneru no estudante sira prontu hodi rejeita no denúnsia prátika asédiu seksuál.

Liuhusi formasaun ida-ne’e mós sei aumenta koñesimentu estudante sira hodi identifika situasaun potensiál VBJ no asédiu seksuál iha kampus, estudante iha kapasidade atu envolve iha asaun prevensaun hanesan kampaña no aktivizmu pozitiva sira, promove kultura respeitu no seguransa ba estudante hotu, redús kazu diskriminasaun no asédiu seksuál iha ambiente universitáriu no aumenta partisipasaun ativa mane ho feto iguál iha vida akadémiku no lideransa.

Sekretaria Estadu ba Igualdade hamutuk ho parseiru sira halo ona formasaun ho tópiku hanesan ba iha Estudante sira iha UNTL no Universidade privadu no Estudante iha munisípiu sira ho fasilitadór mai husi SEI liuhusi Diresaun Nasionál Polítika Igualdade Jéneru (DNPIG) hamutuk ho Parseiru ALFeLa, FOKUPERS no TAF-NABILAN.

Abertura ba formasaun refere Diretór-Jerál SEI, Sr. Armando da Costa hetan akompaña husi Diretór Nasionál Polítika Igualdade Jéneru, Sr. Abilío Barreto, Diretora-Ezekutiva ALFeLa, Sra. Marcelina Amaral, reprezentante Fokupers, TAF-NABILAN no reprezentante Reitor UNPAZ nian.

#Média SEI#

Fontes: https://www.facebook.com/share/p/1SE5AzGJ9U/