Governo Timor-Leste inaugura ofisialmente sistema fornesimentu bee-moos ba komunidade Maubisse iha loron Kinta, 26 Setembru 2025, hodi benefisia ema 2,760, husi família 467 família iha Postu Administrativu Maubisse, Munisipiu Ainaro. Imagen/©MediaGVMAP/Sergio Silva

Ainaro, 26 setembro 2025 – Inaugurasaun ne’e lidera husi Ministru Obras Públikas (MOP), S.E Samuel Marçal, akompaña husi Vise-Ministru ba Asuntus Parlamentares (VMAP), S.E Adérito Hugo da Costa, no reprezentante sira husi Bee Timor-Leste, (BTL, E.P), hamutuk ho autoridade lokál no komunidade sira. 

Aleinde ne’e VMAP, S.E Adérito Hugo da Costa subliña katak projetu ne’e mai hanesan resposta ba demanda husi estudante sira, akademiku sira, no sosiedade sivil ne’ebé apelu ba atensaun liu tan ba infraestrutura básika.

“Governu rona no responde ba nesesidade povu nian, no projetu ne’e prova katak ita halo seriamente kompromisu ita-nia ba dezenvolvimentu nasionál”, dehan VMAP.

Projetu Bee-moos ne’e ho orsamentu USD $642,972.45 ne’ebé inklui mós, tanke rezervatóriu boot 2 unidade (150 m³ kada ida), tanke redus bee 7 unidade (20 m³ kada ida) no istema kanalizasaun kompletu husi bee-ulun to’o tanke rezervatóriu.

Nune’e VMAP mós apela ba lider komunitária sira atu tau matan no mantein infraestrutura ne’e. 

“Infraestrutura ne’e mak patrimóniu husi komunidade. Ita presiza servisu hamutuk atu kuidar no garante katak jerasaun futuru sira bele benefisia mós”, dehan S.E Adérito Hugo da Costa. Iha fatin hanesan, Prezidente Autoridade Munisípiu Ainaro, Manuela Carmo Bucar Corte-Real, hato’o agradese boot no hateten “Espera ho bee ne’e mai bele suporta atividade ekonómia família nian”.

Inaugurasaun ne’e marka realizasaun importante ida husi Programa IX Governo Constitucional, ne’ebé kompromete atu rezolve problema infraestrutura básika durante mandatu lima tinan nian.

S.E Marçal subliña katak bee-moos, estrada no eletrisidade mak povu nia direitu atu ejizi, tanba nasaun no Estadu iha mai husi povu nia luta. “Governu iha dever tomak atu serbí povu ho di’ak”, dehan MOP

Projetu ne’e espera atu hadia kualidade moris, apoiu ekonómia família, fortalese infraestrutura básika, no promove dezenvolvimentu iguál iha área rurál Timor-Leste tomak.

Entretantu Serimónia inaugurasaun ne’e marka prezensa masimu reprezentante Governo, MOP, Estatal, VMAP, Membru PN balun, Bee Timor-Leste, (BTL, E.P), Autoridade Lokál sira, Veteranu sira, PNTL no Komunidade lokál sira. ©MediaGVMAP

Link: Governo Inaugura Sistema Fornesimentu Bee-Moos ba Komunidade Maubisse | Portal GVMAP