Serimónia lansamentu ne realiza iha resintu estatua Dom Boaventura nia oin, Postu Administrativu Same, Munisípiu Manufahi, Primeiro-Ministru (PM), S.E Kay Rala Xanana Gusmão lidera lansamentu fatuk dahuluk ba projetu konstrusaun estrada ligasaun Luak–Betano iha loron 28 fulan setembru, tinan 2025. Imagen/©MediaGVMAP/Sergio Silva

Luak, Manufahi, –  Iha serimónia ne’e, S.E Primeiru-Ministru (PM), hamutuk ho delegasaun ofisial sira halo lansamentu fatuk dahuluk, ne’ebe simboliza inísiu ofisial ba projetu konstrusaun estrada ne’ebe sei liga Luak ba Betano.

Iha intervensaun, S.E Primeiro-Ministru (PM), Xanana Gusmão halo apelu importante ba komunidade sira iha munisípiu Manufahi, “husu ba populasaun atu akompaña didi’ak dezenvolvimentu projetu ne’e hodi kontribui hamutuk ba susesu, labele halo impedimentu ruma ba implementasaun no asegura katak projetu finaliza tuir tempu ne’ebe determina”,dehan PM.

Primeiro-Ministru subliña katak projetu ne’e nia objetivu prinsipal maka atu lori benefísiu ba populasaun hotu iha munisípiu Manufahi.

Konstrusaun estrada ligasaun Luak–Betano reprezenta investimentu importante ba dezenvolvimentu infraestrutura iha Munisípiu Manufahi. Estrada ne’e sei fasilita ligasaun no mobilidade entre komunidade sira, promove dezenvolvimentu ekonómiku, no hadia asesu ba servisu públiku sira.

Projetu ne’e komplementa esforsu governu nian ba dezenvolvimentu nasionál no hatudu kompromisu ba rejiaun sira liu husi investimentu iha infraestrutura báziku.

Atividade importante ida ne’e hetan partisipasaun husi membru sira husi IX Governu Konstituisional no Membru Parlamentu Nasional, ne’ebe hatudu kompromisu governu nian ba dezenvolvimentu infraestrutura iha munisípiu Manufahi, inklui autoridade lokal sira no komunidade sira. ©MediaGVMAP

Link: Governo  Lansa Fatuk Dahuluk ba Projeto Estrada Luak-Betano | Portal GVMAP