Asuntu : 𝐌𝐎𝐏 𝐈𝐍𝐀𝐆𝐔𝐑𝐀 𝐏𝐑𝐎𝐉𝐄𝐓𝐔 𝐁𝐄𝐄-𝐌𝐎𝐎𝐒 𝐍𝐎 𝐒𝐄𝐋𝐄𝐁𝐑𝐀 𝐀𝐍𝐈𝐕𝐄𝐑𝐒Á𝐑𝐈𝐔 𝐁𝐓𝐋,𝐄.𝐏 𝐁Á 𝐃𝐀𝐋𝐀 𝐋𝐈𝐌𝐀 (𝐕) 𝐈𝐇𝐀 𝐒𝐔𝐊𝐔 𝐌𝐀𝐔𝐁𝐈𝐒𝐒𝐄 𝐕𝐈𝐋𝐀. 𝐀𝐢𝐧𝐚𝐫𝐨, 𝟐𝟔 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓 Ministru Obra Públikas, Samuel Marçal akompaña ho Vise-Prezidente Asuntu Parlamentár Aderito Hugo da Costa,Vise-Ministru Administrasaun Estatál, Jacinto Rigoberto G. de Deus, Prezidente Bee Timor-Leste’E.P (BTL) Gustavo da Cruz inagura projetu bee-moos inklui selebra aniversáriu BTL,E.P bá dala lima (V) iha suku Maubisse Vila, Postu Administrativu Maubisse no Munisípiu Ainaru. Iha intervensaun Ministru Obras Públikas Samuel Marçal, hato’o agradesementu bá povu Maubisse nia pasiensia durante ne’e, maske dezenvolvimentu iha postu ne’e la’o tarde oituan maibé nafatin iha esperansa, ohin loron hahú hakat neineik konsege asesu ona bee-moos. "Ohin ita mai iha ne’e laos inagura bee-moos maibe mai atu rona mós saida mak povu ne’e presiza, hafoim ha’u simu tiha posse hanesan Ministru Obras Públikas, Primeiru-Ministru fó orientasaun bá ha’u atu tau importánsia bá infraestrutura bázika sira iha territóriu Timor laran tanba nia (PM) hatene tebes situasaun sira ne’ebé povu infrenta,”dehan Ministru Obras Públikas. Ministru Obras Públikas, hatete ohin loron iha ne’e marka prezensa membru Governu lubuk ida. Membru Governu sira mai hodi marka prezensa iha ne’e tanba hakarak rona saida mak povu iha Postu Maubessi ne’e hakarak. “Responsabilidade ne’ebé atribui ona mai ami nia kba’as atu halo dezenvolvimentu hodi konkretiza povu nia mehi bá luta ukun rasik a’an, povu nia terus (fakar ran) povu nia mate. Iha fatin barak ha’u bá povu sempre halerik bá dezenvolvimentu bee-moos, estrada no eletrisidade, ida-ne’e povu nia direitu atu ejizi tanba estadu mai husi povu, povu nia luta mak hari'i nasaun no Estadu ida-ne’e. Tanba ne’e se de’it mak ukun iha dever tomak serbí povu ida-ne’e ho di’ak,”dehan Ministru Obras Públikas. Entretantu Prezidente Bee Timor-Leste’E’P’ Gustavo da Cruz’ hateten konstrusaun projetu bee ne’ebé ohin mai halo inaugurasaun ne’e, kontrsui hahú iha tinan kotuk tuir kontratu termina fulan neen maibé tanba hasoru difikuldade oioin inklui mós mudansa klimatika nune’e foin finaliza iha tinan ne’e. “Projetu bee moos ne’e rasik fahe bá pakote rua, pakote dahuluk halo kanalizasaun husi bee ulun mai tanke rezervatoriu ne’e responsabiliza husi kompañia Malaka Unipessoal, Lda, no pakote daruak konstrusaun rezervatóriu ne’e responsabiliza husi kompañia Bougenville Unipessoal Lda. Projetu bee moos ne’e gasta orsamentu hamutuk rihun maizumenus $ 642 no fornese bee bá populasaun hamutuk resin 2.760 husi totál uma-kain 467. Husi projetu ne’e ita iha tanke rezervatoriu boot rua ho kapasidade 150 metru kúbiku no tanke redus bee nian hamutuk hitu ho nia kapasidade 20 metru kúbiku,”tenik Prezidente Bee Timor-Leste. Iha biban ne’e Prezidente Autoridade Munisípiu Ainaru’ Manuela Carmo Bucar Corte-Real, lori komunidade Ainaru nia naran hato’o agradesementu bá membru Governu sira-nia prezensa tanba bele hakat mai Maubessi’ Ainaru hodi halo inaugurasaun bee-moos bá komunidade iha Posto Maubessi. “Ha’u agradese tanba ha’u-nia komunidade bele konsumu ona bee-moos husi BTL, ita hotu hatene preokupasaun boot ida husi komunidade mak bee-moos’ espera ho bee ne’e mai bele suporta atividade ekonomia família nian,”PAM Ainaro haktuir. Partisipa iha seremónia inagurasaun projetu bee moos ne’e, Vise-Prezidente Asuntu Parlamentár Aderito Hugo, Vise-Ministru Administrasaun Estatál, Jacinto Rigoberto G. de Deus, Prezidente Bee Timor-Leste’E.P (BTL), Deputadu CNRT, José Virgilio, Diretór Jerál Estrada Ponte Prevensaun no Kontrolu, Nene Lobato, Diretór Nasionál Konstrusaun Vias Rodaviarias, Milton Ramanata de Castro Monteiro, Koordenador Unidade Inspesaun Verifikasaun no Pagamentu, Aleixo Amaral do Carmo, Diretóra Nasionál Aprovizionamentu MOP, Isabel Maria Lay Guterres, Amu Pároco Paroquia Imaculado Coração de Maria Maubisse (PICOMA Sigla Portugés), Padre João Soares, ekipa tékniku husi MOP, Jerente no funsináriu BTL,E.P, Sekretáriu Grande Projetu, ADN, PNTL Postu Maubessi, autoriedade lokál, lia nain, komunidade no estudante sira. *𝐌𝐢́𝐝𝐢𝐚-𝐌𝐎𝐏
Data Publica : 30 Sep 2025
Descrisaun :
