Ministra Solidariedade Sosiál no Inkluzaun, Verónica das Dores, la’o ain hodi vizita Idozus no Ema ho Defisiénsia na’in 4 iha Bairo Ernaro, Suku Mau-Chiga, Postu Administrativu Hatubuilico, Munisípiu Ainaro.

Vizita domisiliáriu ne’e parte ida husi Programa Distribuisaun Asisténsia Umanitária ba sidadauns vulnerável iha Suku Mau-Chiga, ne’ebé realiza iha Segunda-feira (29/09/2025).

Iha vizita domisiliáriu ne’e, Ministra enkoraja família sira atu kuida membrus família ne’ebé Idozus no iha kondisaun defisiénsia. Enkuantu governu liuhusi MSSI sei kontinua esforsu hodi taumatan ho dignu ba Idozus no Ema ho Defisiénsia, inklui sidadauns vulnerável sira seluk iha territóriu nasionál.

Tanba atu taumatan ho dignu, mak Governu hasa’e ona Subsídiu Apoia ba Indozus no Inválides (SAII) liuhusi Dekretu-Lei Nú.8/2024 hatete, ba sidadaun sira ne’ebé ho idade husi tinan 60-69 simu US$60, ba sira ne’ebé ho idade husi tinan 70-79 simu US$80, no ba sira ne’ebé ho idade tinan 80 ba leten simu US$100 kada fulan.

Aleinde apoiu subsídiu, MSSI mós fó apoiu umanitária liuhusi iha vizita sira Ministra MSSI nian ba iha Munisípius, haktuir ba Programa Asisténsia Sosiál ninia Sub-Programa Apoiu Umanitária.

Mídia MSSI