𝐃𝐢𝐥𝐢, 𝟑𝟎 𝐬𝐞𝐭𝐞𝐦𝐛𝐫𝐮 𝟐𝟎𝟐𝟓 — Ministru Negósiu Estranjeiru no Kooperasaun, 𝐁𝐞𝐧𝐝𝐢𝐭𝐨 𝐝𝐨𝐬 𝐒𝐚𝐧𝐭𝐨𝐬 𝐅𝐫𝐞𝐢𝐭𝐚𝐬 tersa-feira ne’e, simu vizita kortejia ida hosi Embaixadór Extraordináriu no Plenipotensiáriu Uniaun Europeia mai Timor-Leste, 𝐓𝐡𝐨𝐫𝐬𝐭𝐞𝐧 𝐁𝐚𝐫𝐠𝐟𝐫𝐞𝐝𝐞, iha MNEK Praia dos Coqueiros, Dili.

Iha reuniaun da-huluk ne’e, Ministru Bendito Freitas fó boas-vindas no parabeniza ba Embaixadór Thorsten Bargfrede, ba nia nomeasaun nu’udar Embaixadór Uniaun Europeia foun iha Timor-Leste, hodi troka nia susesór Embaixadór Marc Fiedrich. Diplomata Uniaun Europeia ne’e aprezenta ninia karta kredensiál ba Prezidente Repúblika, José Ramos-Horta, iha loron 15 fulan-setembru foin lalais ne’e.

Hafoin entrega karta kredensiál, Embaixadór Thorsten Bargfrede realiza ona enkontru kortejia ho Primeiru-Ministru, Kay Rala Xanana Gusmão ho Membru Governu sira seluk hodi hametin liután kooperasaun servisu entre Uniaun Europeia ho IX Governu Konstitusionál.

Além de ne’e, diskute mós kona-ba Timor-Leste nia prosesu adezaun ba ASEAN no mós koooperasaun iha área importante seluk hanesan ekonomia no komérsiu, turizmu, nutrisaun, mudansa klimátika no seluk tan.

Sorumutu ne’e aborda mós kona-ba ajenda Reuniaun Ministerial Indo Pasífiku no Reuniaun Ministeriál ASEAN ho Uniaun Europeia inklui diálogu parseria entre Timor-Leste ho Uniaun Europeia ne’ebé sei realiza iha fulan-novembru tinan ne’e iha Bruxelas.

Fontes: https://www.facebook.com/share/p/19z8YKfE2R/