Baucau, 01 Outubru 2025 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., partisipa hanesan panelista iha Semináriu Nasionál ho téma “Polítika Utilizasaun Produtu Lokal iha Merenda Eskolar: Benefísiu no Dezafiu sira”, ne’ebé hala’o iha Munisípiu Baucau hosi loron 01 to’o 03 Outubru 2025.

Semináriu ida ne’e organiza husi Komisaun D Parlamentu Nasionál, ne’ebé trata Asuntu Ekonomia no Dezenvolvimentu. Objetivu mak atu fó espasu ba diálogu inklusivu kona-ba implementasaun politika merenda eskolar ne’ebé fó prioridade ba utilizasaun produtu lokal.

Semináriu Nasionál ida ne’e hetan konsiderasaun importante iha dezenvolvimentu politika publika ne’ebé fó prioridade ba valorizasaun produtu lokal, sustenta ekonomia komunitária, no reforsa programa merenda eskolar ba benefísiu estudante sira iha Timor-Leste.

Iha Sua Eselénsia Eng. Arsénio da Silva ninia intervensaun hateten, kontribuisaun seitór kooperativa nian liuhosi movimentu kooperativa no grupu produtivu sira iha fornesimentu produtu lokal ba merenda eskolar. Nia mos identifika dezafiu sira ne’ebé kooperativa sira hasoru iha prosesu produsaun no distribusaun, hanesan traktor atu fila rai.

“Governu, liuhosi SEKoop, hanesan fasilitador, kontrola no halo akompañamentu ba inisiativa produsaun lokal. Atividade produsaun mak responsabilidade direta husi movimentu kooperativa no grupu produtivu sira, Ami agradesi ba Komisaun D tanba konvite atu partilha kontribuisaun Sekretaria Estadu Kooperativas nian ba programa merenda eskolar,” hateten SEKoop 

Sekretáriu Estadu Kooperativas mos hatudu ba programa-prioridade sira ne’ebé aprova ona iha Parlamentu ba tinan lima nian, hanesan: Bafo Kayrala, Karau Susuben, Bani Ben, Masin, Mina Nu no Mina Kami, ne’ebé bele kontribui direta ba diversifikasaun no seguransa alimantár merenda eskolar.

Abertura ofisiál husi I Vise Prezidente Parlamentu Nasionál, Deputadu Duarte Nunes, no marka prezensa orador sira seluk hanesan Vise Ministru Saúde, Jose Magno, reprezentante Ministériu Administrasaun Estatal, no World Food Programme (WFP). Partisipante sira inklui Deputadu husi Komisaun D no F, Prezidenti Autoridade Munisípiu sira, Administrador Postu Administrativu, no lideransa komunitária sira iha Baucau.

#Média SEKoop#