Dili, 02/10/2025; Vise-Ministru ba Operasionalizasaun Ospitál (VMOH-sigla portugés) no Ministru Saúde em ezersísiu dr. Flávio Brandão Mendes de Araújo akompaña Vise-Primeiru Ministru, Ministru Koordenadór ba Assuntus Sosiais, Eng. Mariano ASSANAMI Sabino, hala’o vizita servisu ba Institutu Nasionál Farmásia Produtu no Medikamentu (INFPM) iha Kampung Alor, hodi observa direta servisu jestaun ba medikamentu iha INFPM ba sentru, postu saúde no ba ospitál referál no nasionál sira iha Timor-Leste.

Iha vizita ne’e, Vise-Primeiru Ministru apresia ho estrutura INFPM ne’ebé presta ona servisu ho másimu, maske sei hasoru hela dezafiu oioin kona-ba menus medikamentu, maibé situasaun atuál ne’e iha INFPM aimoruk sufisiente tamba stock-out menus husi pursentu 15.

Iha biban ne'e Ministru saúde interinu apela ba dirijentes hotu ministériu saúde nian liuliu ospitál, sentru saúde no postu saúde, servisu hamutuk di'ak liu taan ho INFPM atu halo meius distribuisaun ida ho efetivu.

"Mai iha ne'e hodi haree kona-ba stock-out no mós kona-ba dijitalizasaun iha progresu balun iha ne'e, uluk ita seidauk introdús sistema dijitalizasaun, ohin ita iha sistema dijitalizasaun sistema Barcode, ne'e sistema hodi trecking aimoruk bele diferensa ho aimoruk ne'ebé husi setór privadu nian, ne'e meius ida atu minimiza ita-nia deskonfia malu iha tempu naruk" dehan VMOH.

Alende ne’e, INFPM mós dadaun ne’e kria ona sistema oinsá halo kontrolu ba medikamentu sira-ne’ebé sirkula, ai-moruk hirak ne’e iha ona Barcode tanba ne’e fásil sira kontrola.