Dili loron 3, fulan Outubru, tinan 2025 Sekretáriu Estadu ba Formasaun Profisionál no Empregu, Sua Exelénsia Rogério Araújo Mendonça L.Ed, partisipa iha serimónia asina kontratu traballadór 118 ho familia no Governu molok sira aranka ba servisu iha nasaun Austrália.

Iha diskursu sekretariu Estadu husu ba traballadór sira atu servisu ho di'ak, tanba oportunidade ne'ebé sira hetan, iha jovem barak mak hein hela.

"Ha'u husu ba traballadór sira atu uza oportunidade ida ne'e ho di'ak, tanbá jovem barak mak hakarak hetan oportunidade hanesan imi, maibe agora sira hein hela," dehan Sekretáriu Estadu iha serimónia despedida iha otél Palm Spring.

Sekretáriu Estadu akresenta liután katak, traballadór foun sira atu banati tuir traballadór tuan sira, hodi halo adaptasaun ba ema nia ambiente tuir prosedimentu ne'ebé mak empregadu sira iha.

"Ha'u husu ba traballadór foun sira ba servisu tenke halo adaptasaun ho ema nia ambiente, atu servisu tuir oras disiplina iha servisu fatin no hatudu prestasaun servisu ne'ebé di'ak, atu nune'e fila-fali mai Empregadór bele bolu fali imi, no ida ne'e ba traballadór tuan sira laos buat foun," tenik Sekretáriu Estadu.

Sekretáriu Estadu mós husu ba traballadór sira ba servisu fila mai labele hanesan nafatin ida agora sei iha Timor ne'e, presiza halo investimentu ruma ba negosiu, atu nune'e osan ne'ebé sira hetan bele sirkula iha rai laran no bele mós emprega fali jovem sira seluk ne'ebé mak dezempregu, nune'e sira bele ajuda governu atu reduz numeru dezempregu.

Iha serimónia ne'e partisipa husi Primeira Sekretaria embaixada Austrália iha Timor-Leste Penny Roberts, Diretór Nasionál Empregu Estránjeiru João Correia Pereira, Koordenador PLMSP Geraldo Ximenes, traballadór ho familia.

#MediaGSE