Díli, 2 Outubru 2025-Vise-Ministru ba Asuntu Parlamentares, iha Prezidénsia Konsellu Ministrus, S.E Adérito Hugo da Costa, ohin simu audiénsia, Embaixadora Repúblika Kuba iha Timor-Leste, S.E Grisel Alina Aldama Innis. Enkontru ne’e, diplomata mak husu, hodi diskute no aprofunda kooperasaun estratéjika no relasaun bilateral entre nasaun rua ne’e.

Durante reuniaun, diskute área oioin ne’ebé iha ligasaun ba malu, ho fokus espesiál ba setór saúde. Rekonese papél importante ne’ebé Kuba dezempeña iha apoiu ba formasaun quadru timoroan sira, iha projetu kooperasaun ne’ebé konsidera hanesan susesu no estende ona liu dekada rua, permiti formasaun ba doutór timoroan barak.

Iha área desportu no edukasaun, diskute mós projetu kooperasaun ho Ministériu Juventude, Desportu, Arte no Kultura no Universidade Nasionál Timor Lorosa’e (UNTL). Projetu hirak ne’e inklui prezensa dosente no treinadores kubanus sira hodi hanorin no apoia treinu seleksaun nasionál sira iha modalidade boxe no atletismu, reforsa interkámbiu koñesimentu tékniku no prátiku.

VMAP, S.E Adérito Hugo da Costa subliña katak kooperasaun ho Kuba lori benefísiu konkretu ba Timor-Leste. Benefísiu sira ne’e hatudu la’ós de’it iha formasaun quadrus kualifikadu sira no transferénsia koñesimentu esensiál, maibé mós iha reforsu relasaun amizade bazeia ba solidariedade no respeitu mútuu.

Vise-Ministru destaka, mós, importánsia hodi kontinua identifika área foun kooperasaun nian ne’ebé bele, ho maneira boot liu, kontribui hodi hadi’a kualidade moris populasaun nian no bem-estar labarik no joven sira husi rai ne’e.

Asuntu sira ne’ebé diskute iha enkontru sei fó ba liñas ministeriál kompeténte sira (hanesan Ministériu Saúde, Ministériu Edukasaun no Ministériu Juventude, Desportu, Arte no Kultura). Prosedimentu ne’e hodi garante nia akompaña, análize aprofundadu no dezenvolvimentu iha kuadru orientasaun estratéjika Governu nian.

Fontes: Timor-Leste no Kuba Reforsa Parseiru Estratéjiku | Portal GVMAP