Díli-Kinta, 02/10/2025, Sua exelénsia Vise-Ministra Finansas Sra. Felícia Claudinanda Crus Carvalho halo abertura ba formasaun no monitorizasaun, ne’ebé realiza husi Unidade Monitorizasaun no Avaliasaun Dezempeñu, ho objetivu atu mellora kapasidade funsionáriu diresaun planeamentu liña ministériu sira-nian iha futuru.

Iha abertura ba formasaun ne’e Vise-Ministra Finansas husu partisipante sira iha formasaun ne’ebé mai husi diresaun administrasaun, finansas, aprovizionamentu no planeamentu atu entende uainhira Ministériu Finansas distribui kalendariu jornada orsamentál diresaun sira relevante tenke relata kedas ba superior masimu instituisaun nian atu bele halo diskusaun, kona-ba diresaun polítika nune’e define planu sira ho loos no klaru, atu evita viroment ba orsamentu ne’ebé sempre akontese kada tinan husi liña ministériu.

Vise-Ministra Finansas mós destaka funsionáriu sira atu halo planu asaun anuál ministériu nian presiza entende elementu tolu atu sukat maka baseline, target no rezultadu. Nu’udar ezemplu uainhira ministériu ida halo programa kona-ba dijitalizasaun, ne’e presiza haree ona salariu vensimentu, bens serbisu no kapitál minór, tanba sei hasoru prosesu rekrutamentu, salariu ba traballador inklui komputadór no meza nune’e ema uza atu halo serbisu.

Aleinde ne’e Diretór Jerál Unidade Monitorizasaun no Avaliasaun Dezempeñu Sr. Arlindo da Cruz Monteiro, hateten formasaun kona-ba monitorizasaun no avaliasaun dezempeñu ne’e importante tanba ida ne’e iha futuru uainhira halo relatoriu implementasaun programa, ita la’ós haree de’it numeru ezekusaun orsamentu, maibé foka liubá dezempeñu implementasaun programa, nune’e bele halo melloramentu ba relatoriu tuir prinsipiu planu orsamentu pur-programa nian.

Iha fatin hanesan Inspetór xefe, Sra. Brígida Gomes Pereira, xefe seksaun ba monitorizasaun no avaliasaun planeamentu no estratéjiku PNTL hateten sente kontente tanba formasaun ne’e ajuda tebes ami nia serbisu, durante ne’e iha kuñesimentu báziku de’it maibé liuhusi formasaun hanesan ne’e mellora liután ami nia kuñesimentu kona-ba oinsá dezenvolve relatoriu dezempeñu mai governu ho di’ak.

Sr. Fransisco Soares nu’udar tékniku superior monitorizasaun no avaliasaun Ministériu Administrasaun Estatál agredese Ministériu FInansas tanba fornese ona formasaun durante loron tolu nia laran aprende barak kona-ba define klaru impaktu husi programa nia outcome, output no atividade, aprende kona-ba oinsá halo jestaun ba risku nomós ami bele iha kuñesimentu ba padraun internasionál monitorizasaun no avaliasaun ne’ebé uza iha Timor-Leste.

Formasaun realiza durante tolu, termina ho fahe sertifikadu ba partisipante sira, realiza iha sala auditorium Ministériu Finansas Aitarak-laran. Hetan prezensa másimu husi funsionáriu diresaun planeamentu liña ministériu sira, inklui PNTL no F-FDTL.

#Foto: #Ekipa #Media #Ofisial #Ministériu #Finansas