𝐃Í𝐋𝐈, 𝟎𝟑 𝐎𝐔𝐓𝐔𝐁𝐑𝐔 𝟐𝟎𝟐𝟓 – Governu Timor-Leste liuhosi Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sesta liubá akompaña hosi Diretór Jerál Peskas, Acácio Guterres soru-mutuk ho Duta Besar Republik Indonesia iha Díli, Timor-Leste, 𝐎𝐤𝐭𝐨 𝐃𝐨𝐫𝐢𝐧𝐮𝐬 𝐌𝐚𝐧𝐢𝐤, ho delegasaun hosi Institut Pertanian Bogor (IPB), hodi ko’alia kona-ba estabelesimentu sentru viveirus ikan iha Munisípiu Aileu.

Iha soru-mutuk ne’ebé hala’o iha salaun Nusantara KBRI, Dili, ne’e parte rua ofisialmente lansa mós programa ho tema “Dezenvolvimentu Akuakulturu Integradu iha Timor Leste: Kombate Malnutrisaun no Hasa’e Seguransa Ai-haan (Integrated Aquaculture Development in Timor-Leste: Fighting Malnutrition and Improving Food Security) liuhusi Programa Kick-Off Meeting no Treinamentu.

Programa ne’e hanesan akompañamentu ba akordu subvensaun entre Governu Repúblika Indonesia liuhusi Fundu Kooperasaun Dezenvolvimentu Internasionál (LDKPI/ Indonésian Aid) no Governu Repúblika Demokrátika Timor-Leste, ne’ebé asina iha loron 13 Juñu 2025.

Iha lansamentu ne’e, diskursu Sekretáriu Estadu Peskas, Dr. Domingos da Conceição dos Santos “Mau-caro”, hato’o apresiasaun ba Governu Indonesia no IPB ne’ebé fó apoiu no mentoriza akikultór sira iha Aileu atu bele implementa atividade akikultura ho sistema modernu.

“Ita hatene katak durante ne’e kapasidade ba atividade akikultura nian seidauk sufisiente, maibé ho servisu hamutuk ne’e bele hasa’e Akikultór sira-nia koñesimentu”.

Nia subliña, hasae produsaun ikan la’ós atu redus de’it mal-nutrisaun, maibé mós atu hasa’e rendimentu ekonimia família, ne’e hanesan fatór ida ba dezenvolvimentu nasionál.

Tanba ne’e, ikus Lideransa Peskas ne’e, espera ho akompañamentu hosi IPB ba Akikultór sira bele kontribui ba dezenvolve atividade akikultura iha Timor-Leste.

Iha fatin hanesan, Embaixadór Indonesia iha Timor-Leste, Okto Dorinus Manik, hatete programa ne’e nu’udar demonstrasaun amizada ba kooperasaun besik entre Indonesia no Timor-Leste.

“Foku prinsipál mak dezenvolvimentu akikultura integradu, ne’ebé hein atu hametin seguransa ai-han, hasae abilidade akikultór sira nian, no benefisia direta ba komunidade”.

Nia hatutan, programa ne’e nu’udar kolaborasaun parte rua ho akikultór balun husi Timor-Leste partisipa mós treinamentu iha Bogor.

Iha sorin seluk, Reprezentante Prezidente Autoridade Munisipiu Aileu, Victoria Maria de Oliveira agradese ba Governu Indonesia no Timor-Leste ne’ebé hili Aileu sai pilot project akikultura nian.

#Média_SEP