Díli, 4 Outubru 2025 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., ofisiálmente halo abertura ba prosesu kasting ba filme foun ho titulu “Kumpri Promesa ba Timor-Leste”, ne’ebé sei fó oportunidade ba juventude Timor oan atu partisipa iha produzaun filme nian hanesan autor no artista.

Filme refere sei haktuir istória verdadeira kona-ba kontribuisaun juventude rezisténsia, liu-liu estudante sira Timor oan ne’ebé iha tempu okupasaun estuda hela iha Indonézia. Istória sei loke prespektiva kona-ba luta juventude sira nian kontra rejimi militár Suharto, liu hosi ativadade sira iha nivel estudante nian.

Iha abertura nian, Sekretáriu Estadu Kooperativas hateten katak filme ne’e sei sai meiu importante atu dokumenta istória no sakrifísiu estudante sira iha tempu ne’ebá. “Estudante sira halo rezisténsia iha rai laran kontra inimigu. Sira fó-an ho totalidade ba povu no rai ne’e. Filme ida ne’e sei fó oportunidade atu dokumenta istória ida ne’ebé la’o tiha ona, no mós atu loke konsiensia patriotizmu ba gerasaun foun,” hateten SEKoop.

Hanesan ex-ativista rezisténsia iha tempu okupasaun, Eng. Arsénio mós partilha esperiénsia pessoal kona-ba movimentu estudante sira iha Jakarta iha tinan 1990-an, ne’ebé hadia liafuan ba solidariedade internasional no loke dalan ba independénsia.

Filme “Kumpri Promesa ba Timor-Leste” sei produz husi Asosiasaun Membru CEGNAG Production Film (AMCPF), nudar forma atu valoriza istória nasional no edukadu sosiedade kona-ba luta ba independénsia.

Seremónia kasting ne’e mós markadu ho prezensa: Diretór Jerál husi Sekretaria Estadu Arte no Kultura, Dirijente husi AMCPF, Juventude sira ne’ebé tuir prosesu seleksaun.

Filme ne’e bele sai plataforma ba juventude Timor oan atu kontribui ba prosesu kriativu no mós valorizasaun istória nasional, hanesan parte importante husi dezenvolvimentu identidádi nasionál.

#Média SEKoop#