Díli, 6 fulan-outubru tinan 2025__Sua Exelénsia Sekretária Estadu ba Igualdade, Sra. Elvina Sousa Carvalho ho Reprezentante Rezidente PNUD iha Timor-Leste, Sra. Katyna Argueta hala’o asina Nota Intendimentu (MoU) kona-ba Selu Igualdade Jéneru (Gender Equality Seal) ba haforsa Igualdade Jéneru iha aspetu hotu-hotu iha Timor-Leste.

Selu Igualdade Jéneru (Gender Equality Seal) nu'udar prosesu sertifikasaun ida, liuliu husi Programa Nasoins Unidas ba Dezenvolvimentu (PNUD), ne'ebé rekoñese no insentiva organizasaun no instituisaun públiku sira atu integra prinsípiu igualdade jéneru iha sira-nia servisu tomak no atinje rezultadu ne'ebé bele sukat hodi avansa igualdade jéneru no empoderamentu feto sira-nian. Programa ne'e sai hanesan plataforma aprendizajen ida hodi tulun organizasaun sira atu hadi'a estratéjia, rezolve lakuna jéneru, no hatudu kompromisu maka'as ba padraun globál sira kona-ba igualdade jéneru.

Sua Exelénsia Sekretária Estadu ba Igualdade, Sra. Elvina Sousa Carvalho iha intervensaun hatete katak asina akordu ida-ne’e importante tanba sei haforsa Governu Timor-Leste iha área krítiku haat mak hanesan Haforsa Kapasitasaun ba liña ministériu sira kona-ba orsamentu responsivu ba jéneru; Haforsa Rede no Revizaun Koñesimentu no Haforsa Informasaun, Komunikasaun no Teknolojia.

Sua Exelénsia SEI hatutan katak orsamentu responsivu ba jéneru mak ezersísiu polítiku no tékniku, tanba ne’e presiza aprosimasaun transformativu ne'ebé integra perspetiva jéneru iha faze hotu-hotu siklu orsamentál nian iha kolesaun reseita ida-ne'ebé bele responde ba nesesidade ketak ba feto, mane, labarik-feto no labarik-mane sira-nian, no katak polítika no programa Governu nian kontribui ho signifikativu ba redusaun dezigualdade jéneru.

“Liuhusi parseria ida-ne'e, SEI no UNDP, Ita sei servisu hamutuk ho Liña Ministériu no Instituisaun Estadu sira hodi hametin sira-nia kapasidade hodi halo análize ba despeza no kolesaun reseita bazeia ba perspetiva jéneru”.

“Nu'udar Sekretária Estadu ba Igualdade, ha'u orgullu atu promove inisiativa sira kona-ba sinál jéneru, ne'ebé oferese enkuadramentu inovativu no ida-ne'ebé bazeia ba rezultadu ba instituisaun sira atu avalia no hadi'a sira-nia dezempeñu kona-ba igualdade jéneru”, Exelénsia Elvina Sousa Carvalho haktuir.

Iha tempu uluk Sekretaria Estadu ne'e fó ona prémiu jéneru ba ministériu no instituisaun sira ne'ebé dedika sira-nia servisu atu promove igualdade jéneru no empoderamentu feto nian.

Exelénsia SEI afirma katak ho introdús Selu Igualdade Jéneru (Gender Equality Seal) ne’e, la’ós de'it rekoñesimentu maibé hanesan prosesu ne'ebé enkoraja liña ministériu no instituisaun sira atu harii fatin servisu inkluzivu liu, adopta polítika sensivel ba jéneru, no serve hanesan kampiaun ba mudansa iha sira-nia setór laran. Inisiativa ida-ne'e apoia ita-nia kompromisu nasionál sira tuir Politika Nasional Jéneru no ita-nia obrigasaun ne'ebé luan liu tuir Objetivu sira Dezenvolvimentu Sustentavel nian, liuliu Objetivu 5 no CEDAW.

Governu Timor-Leste halo ona esforsu importante ba igualdade jéneru, maibé sei iha barreira estruturál sira. Tanba ne'e, atu hetan mudansa transformativu presiza parseria forte, advokasia ne'ebé kontinua, no asaun konkreta.

Iha asina MoU ne’e marka mós prezensa husi Sua Exelénsia Prezidente Tribunál Rekursu, Dr. Afonso Carmona; Reprezentante Embaixadór Uniaun Europeia iha Timor-Leste; Reprezentante husi Ministériu Finansas; Komisaun Funsaun Públiku; Diretór-Jerál SEI, Sr. Armando da Costa; Xefe-Gabinete SEI, Sra. Angelina Machado de Jesus; Inspetora no Auditoria Interna SEI, Sra. Benigna Maria Amaral; Kargu Diretores no Xefe-Departamentu SEI nian.

#Média SEI#

Fontes: https://www.facebook.com/share/p/17Amp8o5FV/