Dili, 06 Outubru 2025 – Seremónia hasa’e bandeira nasionál realiza iha loron segunda-feira, 06 Outubru 2025, iha resintu Palacio Governo, prezidadu husi Exselénsia Vise-Ministru ba Asuntus Parlamentares, iha Presidensia Konsellu Ministru, e S.E Adérito Hugo da Costa.

Iha diskursu, S.E. Vise-Ministru ba Asuntus Parlamentares, destaka katak seremónia hasa’e bandeira reprezenta momentu importante ida ba nasaun, liu-liu iha fulan Outubru ne’e.

“Momentu ida importante tebes ba ita, tanba iha termus siklu governasaun no ezekusaun Orsamentu Jerál Estadu (OJE) 2025 nian, ita tama ona iha faze trimestre últimu,” esplika Vise-Ministru.

S.E VMAP  enfatiza katak avaliasaun desempeñu iha órgaun sentrál governu nian no administrasaun munisípiu sira durante trimestre dahuluk, daruak, no datoluk hotu-hotu akompaña hela.

“Ita hotu espera katak iha trimestre últimu ne’e, desempeñu no kompromisu ne’ebé ita hotu hakarak halo sei bele atinje nível másimu tuir tarjet ne’ebé ita hotu planeia tiha ona, molok tinan financeiru 2026 tau matan,” dehan Vise-Ministru.

Seremónia hasa’e bandeira ne’e hetan partisipasaun husi diversus entidades no dirijentes governu nian, inklui, S.E. Sekretáriu Estadu ba Komunikasaun Sosiál, Sr. Expedito Dias Ximenes, Prezidente no Komisáriu CFP (Komisaun Funsaun Públika), Diretor Ezekutivu sira husi AMRT I.P. (Autoridade Reguladora Mídia Timor-Leste, I.P.), Diretor Ezekutivu husi Chega! I.P. Inspetor Jerál Inspesaun, Dirijentes Administrasaun Jerál sira Asesores no funsionáriu sira husi Palásiu Governu.

Fontes: VMAP Prezide Seremónia Hasa’e Bandeira Nasionál | Portal GVMAP