Dili, 07 Outubru 2025

Sua-Exelénsia Ministru bá Asuntu Kombatentes Libertasaun Nasionál (MAKLN), Gil da Costa Monteiro “Oan Soru”, ho Sua-Exelénsia Sekretáriu Estadu Veteranus (SEV), Cesar dos Santos da Silva “Merak”, lidera reuniaun jerál ida ne’ebé hala’o iha sala reuniaun Ministériu bá Asuntu Kombatentes Libertasaun Nasionál nian iha Caicoli, Dili, Tersa (07/10/2025).

Reuniaun jerál ida-ne’e hodi kontinua haklean diskusaun sira iha asuntu téknika ninian hodi prepara bá realizasaun seremónia haloot Restos Mortais (mate-ruin) Saudozu no Saudoza sira-nian hamutuk atus-rua sanulu-resin lima (215) iha Suku Fuiluro, Munisípiu Lautém, Suku Ai-teas iha Manatuto no Liquíça Villa.

Iha reuniaun ne’e fórum mós deside halo mudansa bá data realizasaun serimónia haloot restos mortais 60 iha Fuiloru nian muda fali bá loron 24 fulan-Outubru tinan-ne’e, enkuantu seremónia iha Munisípiu Manatuto ho restos mortais 105, no iha Liquíça nian ho restos mortais hamutuk 50 ne’e, kontinua mantein ho data anterior ne’ebé datada ona entre loron 14 fulan-Novembru (iha Manatuto), no loron 12 fulan-Dezembru 2025 (iha Liquíça).

Partisipantes iha sorumutuk alargada ne’e mak hanesan, Diretór jerál bá asuntu Administrasaun no Finansas (DGAF), Diretór jerál bá Asuntu Kombatentes Libertasaun Nasionál (DG-ACLN), Diretóra Finansas, Diretór Nasionál bá Pensaun no Subvensaun (DNPS), Xefe Gabinéte MAKLN, Nilton Ximenes das Neves, Xefe Gabinéte SEV, Abríl Borges, Xefe Departamentu sira, kargu Xefias balu, inklui Asesóres ho Téknikus balu.