Dili, 03 outubru 2025 - Relasiona ho fotográfia ne'ebé virál iha média sosiál kona-ba estudante ida ne'ebé deskonfia hetan agresaun fíziku husi profesora ida, maka Ministériu edukasaun liuhusi Inpeksaun Jerál Edukasaun ne'ebé lidera husi Sub-Inspetór Jerál, Nukleu, Administrasaun Eskolár Sr. Rodolfo Henrique Aparicio hamutuk ho Inspetór Munisípiu Dili nian tun direta ba eskola refere hodi halo idenfikasaun ba akontesimentu ne'e.

Hafoin halo identifikasaun Su b-Inspetór Jerál, Nukleu, Administrasaun Eskolár Sr. Rodolfo Henrique Aparicio hatete, bainhira rona no haree informasaun sira viral iha média sosiál kona-ba estudante ne'ebé deskonfia hetan agresaun fíziku husi nia profesora, maka inspesaun tun direta ba eskola ne'e hodi halo identifikasaun no buka tuir kronolojia husi akontesimentu ne'e.

" Ami identifika ona profesora ne'e iha eskola ida iha kapítál Dili. Tanba ne'e maka ministériu edukasaun provizoriamente fó sasaun displinár ba profesora refere hodi hein nia prosesu legál tuir lei funsaun públika nian ne'ebé aplika ba funsionáriu permanente sira" Dehan Sub.IGE Sr. Rodolfo.

Sub-inspetór ne'e esplika, lei bandu profesór no profesora sira atu halo agresaun fíziku hasoru estudante sira iha eskola tanba profesór nu'udar edukadór ida ne'ebé atu eduka, hadia no guia estudante sira tuir dalan ne'ebé loos maibe la'os eduka ho agresaun fíziku.

" Nune'e ministériu edukasaun sei prosesu profesora refere tuir dalan legál sira hodi hatán ba nia aktu ne'ebé nia komete atu nune'e ba futuru labele akontese tan ba estudante sira seluk" Sub.IGE Argumenta.

Enkuantu Ssub-Inspetór Jerál, Nukleu, Administrasaun Eskolár Sr. Rodolfo Henrique Aparicio husu mós ba profesór no profesóra sira iha territóriu nasionál atu labele halo agresaun fíziku hasoru estudante iha eskola tanba agresaun fíziku ne'e konsidera hanesan aktu krime ida ne'ebé lei bandu.