Vice-Primeiru-Ministru, Ministru Koordenadór ba Asuntu Sosiál no Ministru ba Dezenvolvimentu Rurál no Abitasaun Komunitária, Eng. Mariano Assanami Sabino, ohin participa iha Reuniaun ba dala 34 Konsellu Komunidade Sosio-Kultural ASEAN (KKSA), ne’ebé hala’o iha Selangor, Malásia.

Reuniaun ne’e, ne’ebé prezide husi Sekretáriu-Jerál ASEAN, Dr. Kao Kim Hourn, diskuti direksaun estratéjiku sira husi KKSA atu garante ASEAN ne’ebé reziliente, inkluzivu, dinâmiku no sustentável, no mos troka ideia kona-ba área prinsipal sira iha KKSA no pilar intersetoriál sira, inklui mos hahú implementasaun Plano Estratéjiku KKSA.

Reuniaun ne’e mos lori tempu atu apresia lideransa Malásia nian iha KKSA nia rezultadu no prioridade sira ba tinan 2025, no haree ba oin mos ba presidénsia KKSA ne’ebé sei hala’o husi Filipinas iha tinan 2026.