𝐕𝐢𝐪𝐮𝐞-𝐐𝐮𝐞, 𝟎𝟔 𝐎𝐮𝐭𝐮𝐛𝐫𝐮 𝟐𝟎𝟐𝟓

Primeiru-Ministru, Kay Rala Xanana Gusmão, akompaña husi Ministru Obras Públikas, Samuel Marçal,Vise-Ministru bá Asuntus Parlamentares (VMAP), Adérito Hugo da Costa, Prezidente Autoriedade Viqueque, Francisco C.S de Gonzaga, iha loron sabadu ne’e, ofisiálmente hatur fatuk dahuluk bá konstrusaun Ponte We-Lolo, Aldeia Uma Boot, Suku Luca, Munisípiu Viqueque ho investimentu totál $4,398,863.24.

Iha nia intervensaun, Primeiru-Ministru (PM), Kay Rala Xanana Gusmão, hateten dezenvolvimentu nasionál ne’ebé dau-daun ne’e lao lá akontese hanesan milagre, tanba iha tinan hirak liu bá ema barak lakon sira-nia oan, familia taan deit hakarak rai ne’e di’ak.

“Hau husu bá joven sira atu labele halo impedimentu no tenke tulun Governu hodi aselera lalais konstrusaun ne'e bele hotu lalais. Governu dau-daun ne’e halo esforsu atu halo dezenvolvimentu maibé iha fatin balun komunidade lá kontribui no halo impedimentu ikus-mai difikulta kompañia hodi aselera nia servisu. Iha prosesu hotu, lá akontese hanesan milagre. Ita hatene katak iha tinan hirak liu bá ema barak lakon sira-nia oan, familía taan deit hakarak rai ne’e di’ak,” dehan PM Xanana.

Iha biban ne’e, Ministru Obras Públikas (MOP), Samuel Marçal informa, IX Governu konsidera infraestrutura hanesan prioridade bo’ot ida bá dezenvolvimentu nasionál tanba Ministru Obras husu bá komunidade sira atu labele lakon esperansa, servisu ne’ebé MOP halo neneik maibe bebeik.

“Hau fiar katak povu ida ne’e seidauk lakon esperansa hodi pasiensia nafatin hodi hein estadu ida ne'e hodi serví povu iha rai ida ne'e. Ha’u kontenti tebe-tebes povu ida ne’e nafatin iha pasiensia, mesmu hetan sofre durante tinan rua nia laran tanba Covid-19, iha tempu hanesan ita akontese dezastre naturais hodi estraga komunidade nia uma. Hafoin ha’u simu tiha posse hanesan Ministru. Primeiru-Ministru bolu ha’u hodi fó orientasaun atu rezolve setór infraestrutra sira area rurál. Vique-que ohin marka-taan istoria bo’ot ida tanba PM Xanana mai lansa fatuk dahuluk bá konstrusaun ponte We-Lolo,”hateten Ministru Obras Públikas.

Alende ne’e Ministru Obras Públikas husu mós bá komunidade sira atu labele lakon esperansa.

Iha fatin hanesan,Vise-Ministru bá Asuntus Parlamentares (VMAP), Adérito Hugo da Costa, esplika dadu-daun ne’e projetu balun iha progressu ona no balun foin hahu.

“Ida ne’e mak esforsu IX Governu nian tuir kompromisu ne’ebé ita trasa to’o mandatu ida ne’e remata. Iha fatin barak mak ita halo ona lansamentu ho montante ida ne’ebé bo’ot tebes,”Vise-Ministru bá Asuntus Parlamentares informa, kada semana, deputadu sira iha Parlamentu Nasionál sempre relata problema infraestrutura no sosial sira ne’e bá Governu.

“Hanesan portavoz ka reprezentante governu nia bá Parlamentu, atu hateten de’it Ami nafatin tau atensaun bá problema sosiál hirak ne’ebé, povu enfrenta. Espera ho lansamentu fatuk dahuluk bá kontrusaun Ponte We-Lolo, sei fó benefísiu bo’ot bá komunidade lokál hodi asesu no konektividade, fasilita movimentu bá eskola, sentru saúde, fasilitasaun transportasaun produtu agrikultura, fortalese ligasaun entre komunidade rurál no sentru urbanu no seluk taan.

Lansamentu Fatuk Dahuluk Ponte We-Lolo reprezenta la’os de’it projetu infraestrutura maibé kompromisu konkretu IX Governu Konstituisionál nian bá dezenvolvimentu balansu iha territóriu nasionál tomak, Ponte We-Lolo ne’e konstrui husi kompañia Nananiu Unipessoal, Lda, durasaun servisu 365, montante orsamentu $4,398,863.24.

Partisipa iha seremónia lansamentu Ponte We-Lolo, Vise-Prezidente Asuntu Parlamentár Aderito Hugo, Vise-Ministru Administrasaun Estatál, Jacinto Rigoberto G. de Deus’ Prezidente Bee Timor-Leste’E.P (BTL), Deputadu CNRT, José Virgilio, Diretór Jerál Estrada Ponte Prevensaun no Kontrolu, Nene Lobato, Diretór Jerál Habitasaun Urbanismu, Domingos de Jejus Sequeira, Diretór Nasionál Konstrusaun Vias Rodaviarias, Milton Ramanata de Castro Monteiro, Koordenador Unidade Inspesaun Verifikasaun no Pagamentu, Aleixo Amaral do Carmo, Diretóra Nasionál Aprovizionamentu MOP, Isabel Maria Lay Guterres, Jerente no funsinariu BTL,E.P, Sekretáriu Grande Projetu, ADN, PNTL Munisípiu Vique-que, autoriedade lokál, lia nain, komunidade no estudante sira.

*𝐌𝐢́𝐝𝐢𝐚-𝐌𝐎𝐏