𝐕𝐢𝐪𝐮𝐞-𝐐𝐮𝐞, 𝟎𝟓 𝐎𝐮𝐭𝐮𝐛𝐫𝐮 𝟐𝟎𝟐𝟓

Primeiru-Ministru, Kay Rala Xanana Gusmão, akompaña husi Ministru Obras Públikas, Samuel Marçal, Prezidente Autoriedade Viqueque, Francisco C.S de Gonzaga, hatur fatuk dahuluk ba projetu reabilitasaun estrada husi Rai-hun, Suku Luka, Postu Administrativu Vique-que Vila liga bá Postu Administrativu Lakluta ho distánsia kilómetru 14.

Iha seremónia lansamentu ne'e, PM Xanana hateten, lansamentu estrada ne'e laos prezente ida povu Lakluta, maibe ida ne’e nu'udár devér husi Governu hodi ezerse nia komprimisiu hodi hadia infraestrutura sira iha area rurál.

“Estrada ne'ebé ohin ita lansa ne'e, la'os prezente maibé ida-ne'e faz parte ida husi Governu nia dever hodi kria kondisaun estrada, bee moos no eletrisidade bá povu Lakluta. Ha’u kontenti tanba Lakluta oan sira hahu'u husi katuas, ferik fuuk mutin ho alin kiik oan sira, kontente ho lansamentu estrade ne’e, ”dehan PM Xanana.

Alende ne’e xefe Governu lori mós komunidade Lakluta nia naran hodi husu bá empreza ne’ebé toma resposavel bá projeitu estrada ne’e atu kaer obra ne’e ho diak.

“Ha'u lori povu Lakluta nia naran husu empreza halo estrada ho di'ak no kualidade. Husu mós bá joven sira ha’u lakohi iha fatin ne'e akontese, problema artemarsiais, husu mós bá imi atu hadomi malu labele kria rivalidade entre grupu atu nune’e projeitu refere bele hotu tuir tempu termina ona iha kontratu,”hateten PM Xanana.

Iha biban ne’e, Ministru Obras Públikas (MOP), Samuel Marçal haktuir, konstrusaun bá obra ne'e uza povu nia osan, tanba ne'e iha seremónia lansamentu asina mós kontratu bá konstrusaun estrada ne’e iha komunidade Lakluta nia oin, atu nune’e povu bele sai sasin bá kontratu entre governu no empreza sira.

“Ha’u husu bá joven sira atu labele halo impedementu bá iha projeitu estrada ne’e, obra ne'e ita-nian, halo bá ita no ita mak uza. Ne'ebé, labele hanesan iha fatin seluk ne'ebé ezije estrada depois ita halo, sira mak halo fali impedimentu, dehan Ministru Obras Públikas.

Entretantu, projetu ne'e Ministru Obras Públikas (MOP), Samuel Marçal asina direta ho empreza responsavel rua. Rehabilitasaunn Lot A, STA 0+00-STA 7+00, kontratu SSS/135/MOP-2025, sei gasta $4.000.215,67, husi Kimberlie konstrusaun Unip, Lda. Enkuantu bá Lot B, STA 7+00-STA 13+922.67, kontratu SSS/136/MOP- 2025, sei gasta $3.494.938,50, projeitu estrada ne’e konstrui husi kompañia Hoven II Unip, Lda, ho durasaun servisu tinan ida, hahú 04 Outubru 2025 sei remata iha 04 Outubru 2026.

Projeitu estrada ne’e lansa husi PM Kay Rala Xanana Gusmão, akompñadu Ministru Samuel Marçal, Autoridade Munisípu Vique-que, Deputadu CNRT, José Virgilio, Diretór Jerál Estrada Ponte Prevensaun no Kontrolu, Nene Lobato, Diretór Jerál Habitasaun Urbanismu, Domingos de Jejus Sequeira, Diretór Nasionál Konstrusaun Vias Rodaviarias, Milton Ramanata de Castro Monteiro, Koordenador Unidade Inspesaun Verifikasaun no Pagamentu, Aleixo Amaral do Carmo, Diretóra Nasionál Aprovizionamentu MOP, Isabel Maria Lay Guterres, Sekretariu Grande Projetu, ADN, PNTL Munisípiu Vique-que, Autoriedade Postu Lakluta, Komandante Polísia Nasionál Timor-Leste (PNTL) Munisípiu Vique-que no hetan partisipa másimu husi populasaun Postu Lakluta.

*𝐌𝐢́𝐝𝐢𝐚-𝐌𝐎𝐏