Dili, 08 Outubru 2028____ Sua Exelénsia Sekretária Estadu ba Igualdade-SEI, Sra.Elvina Sousa Carvalho, ohin Partisipa iha Enkontru Konsellu Ministru nian, iha Palasiu Governu Dili, ne’ebé mak lideradu husi Primeiru-Ministru Kay Rala Xanana Gusmão.

Iha sorumutu ohin IX Governu Konstitusional deside hodi autoriza asinatura Memorandu Entendimentu ida entre Governu Malázia no Repúblika Demokrátika Timor-Leste ba kooperasaun iha ámbitu informasaun no dezenvolvimentu mídia. Memorandu ne’e sei asina husi Sekretáriu Estadu Komunikasaun Sosiál, Expedito Dias Ximenes, no Ministru Komunikasoins Malázia nian, Ahmad Fahmi bin Mohamed Fadzil durante Simeira ASEAN tuir mai, ne’ebé sei hala’o iha loron 24 to’o 26 fulan-outubru iha Kuala Lumpur, Malázia.

Iha sorumutu ohin mos Konsellu Ministrus aprova projetu Rezolusaun Governu nian, ne’ebé aprezenta hosi Ministru Prezidénsia Konsellu Ministrus, Agio Pereira, no Komisaun Funsaun Públika, kona-ba formasaun karakter funsionárius públikus nian, aprova mos Projetu Rezolusaun Governu nian ida, ne'ebé aprezenta hosi Ministra Saúde, Elia A. A. dos Reis Amaral, hetan mós aprovasaun, ne'ebé estabelese númeru vagas ba promosaun pesoál ne’ebé halo parte hosi karreiras profisionais saúde nian iha administrasaun públika.

Nune’e mos iha sorumutu ne’e rasik Konsellu Ministrus aprova projetu Rezolusaun Governu nian, ne’ebé aprezenta husi Primeiru-Ministru, Kay Rala Xanana Gusmão, ne’ebé nomeia membrus foun Konsellu Administrasaun Fundu Espesiál Dezenvolvimentu nian ba Rejiaun Administrativa Espesiál Oe-Kusi Ambenu (RAEOA).

Ikusliu, Konsellu Ministrus deside hodi aprova lema “Que a celebração destes 50 anos, do passado, nos assegure confiança no presente e esperança no futuro!” (“Atu selebrasaun tinan 50, pasadu nian ne'e, fó mai ita konfiansa iha tempu prezente no esperansa ba tempu futuru!”) ba Komemorasaun Aniversáriu Proklamasaun Unilaterál Independénsia Repúblika Demokrátika Timor-Leste nian ba dala 50, ne'ebé akontese iha 28 Novembru tinan 1975.

Ba informasaun kompletu bele klik iha : https://timor-leste.gov.tl/?p=45492&lang=tp

# Média SEI#

Fontes: https://www.facebook.com/share/p/1EcCkEVEqF/