Ermera, 9 Outubru 2025 – Sekretaria Estadu Kooperativas (SEKoop), liu husi Direksaun Nasionál Promosaun Produtus Kooperativas (DNPPC), kontinua halo promosaun ba produtu lokál “Bafo Kay Rala” hodi sustenta programa Merenda Eskolár, iha Eskola Bázika Filiál (EBF) Dona Ana Lemos, Gleno, Munisípiu Ermera.

Sekretáriu Estadu Kooperativas, Arsénio Pereira, hateten katak promosaun ne'e parte husi esforsu governu atu valoriza produtu kooperativa lokál no motiva komunidade agrikultór sira atu kontinua kuda. Produtu Bafo Kay Rala sei kontribui direta ba programa Merenda Eskolár, ne’ebé SEKoop determina atu uja 75% produtu husi rekursu lokál.

“Promosaun ida-ne’e halo iha eskola balu tiha ona. Agora, ami kontinua iha EBF Dona Ana Lemos tanba ami tuir planu promosaun no valorizasaun produtu lokál ne’ebé bele sustenta Merenda Eskolár iha forma nutritivu no sustentável,” nia hateten.

Produtu Bafo Kay Rala ne’ebé hetan promosaun inklui biskuit, sasoro no kaldu bafo. Lansamentu ne'e mós parte husi estratéjia atu hasae konsumidor lokal-nia konhesimentu kona-ba benefísiu produtu kooperativa.

SEKoop halo ona promosaun sira iha munisípiu Oekusi, Likisá, Aileu no agora Ermera. Eskola barak hotu mós hatudu interesse atu simu promosaun iha loron mai.

Koordenadora EBF Dona Ana Lemos, Bonabete Lopes Lemos, hatudu kontente no agradecimento ba SEKoop.

“Ami sente orgullu tanba eskola ne’e sai fatin ba lansamentu. Produtu Bafo Kay Rala mak produtu nutritivu, no ami hein katak sei ajuda programa Merenda Eskolár iha ami-nia eskola,” nia deklara.

Eskola EBF Dona Ana Lemos iha total 31 manorin, 974 estudante no aula 24. Inisiativa ne’e fó esperansa atu aumenta partisipasaun komunidade iha produzaun no sustenta nutrisaun estudante sira iha tinan-eskolár.

#Media SEKoop#