Díli, 9 Outubru 2025 – Primeiru Ministru Kay Rala Xanana Gusmão husu Sekretáriu Estadu Kooperativas (SEKoop) atu kontinua fó prioridade ba promosaun produtu lokál Timor-Leste, liu-liu iha ámbitu ASEAN Cooperative Ministerial Meeting (ACMM) no Expo 2026 ne'ebé sei realiza iha tinan oin iha Díli, Timor-Leste.

Rekomendasaun ne’e hato’o iha okaziaun reuniaun kortezia ne'ebé halo iha Palásiu Governu iha Kinta-Feira dadeer, entre Primeiru Ministru ho delegasaun SEKoop lidera husi Eng. Arsénio Pereira da Silva, M.Agr., Sekretáriu Estadu Kooperativas ho ekipa mak hanesan Diretór Jerál, Eng. Olderico Lopes, Xefe Gabinete Eng. Leovogildo Belarmino, Asesór Jacinto Moreira no Sekretária Ekzekutiva Carlota Fátima de Carvalho.

Hafoin Sekretáriu Estadu Kooperativa relata tiha servisu SEKoop nian, Primeiru-Ministru subliña importánsia atu uza eventu ASEAN Cooperative Ministerial Meeting no Expo 2026 hanesan plataforma estratéjiku atu promove produtu lokál sira inklui produtos husi Bafo Kayrala, Bani Been, mina nu’u, no produtu sira seluk, atu hatudu poténsia no kreatividade movimentu kooperativa no emprendedór lokal sira nian.

Sekretáriu Estadu Kooperativas hateten, preparasaun ba ACMM no Expo 2026 iha ona faze preparasaun inisiál no iha tempu natoon hodi halo preparasaun di’ak liu tán, ho esperansa katak Timor-Leste sei sai hanesan palku ba promosaun importánsia setór kooperativa iha Timor no iha rejiaun.

Iha sorin seluk sei hala’o mos AVMM no Expo 2026 ne’ebé mak bele sai hanesan plataforma ministeriál ne’ebé fó oportunidade ba estadu-membru ASEAN atu diskute, partilla kuñesimentu no hametin kooperasaun iha área kooperativas, emprendedorizmu komunidade no promosaun produtu lokál.

#MédiaSEKoop2025