Díli, 07 Outubru 2025 — Sekretaria Estadu Kooperativa (SEKoop) no Kámara Komérsiu no Indústria Timor-Leste (CCI-TL) asina Nota Entendimentu (MoU) iha Salaun Reuniaun Akait, hodi promove no hametin kooperativa sira iha Timor-Leste.

Akordu ida ne’e asina husi Sekretáriu Estadu Kooperativas, Eng. Arsénio Pereira da Silva, M.Agr., no Prezidente CCI-TL, Jorge Serrano, iha presensa líder sira husi instituisaun tomak.

Objetivu Nota Entendimentu ne’e maka atu:

1. Promove no regula setór kooperativa sira;

2. Fasilita formasaun kooperativa-emprezariál sira iha rai laran;

3. Aumenta asesu ba rekursus finanseiru no oportunidade merkadu sira;

4. Hametin kooperasaun entre setor públiku, privadu no kooperativa sira;

5. Reforsa advokasia politika públika atu sustenta dezenvolvimentu kooperativa.

Iha diskursu ofisiál, Sekretáriu Estadu Kooperativas, Eng. Arsénio Pereira da Silva hateten, akordu ida ne’e importante tebes tanba bele estabelese mekanismu institusionál hodi promove no fortalece setór kooperativa, no bele kontribui ba krésimentu ekonómiku nasional.

"Ita realiza akordu ida-ne'e oinsá gia ita atu serbisu hamutuk, tuir ita-nia lema 'Hamutuk halo mudansa liuhusi dalan kooperativa'," nia hateten.

Prezidente CCI-TL, Jorge Serrano, dehan akordu ida ne'e mak momentu importante atu reforsa kooperasaun entre Governu no setór privadu. "CCI-TL hanesan parseiru estratéjiku Governu nian atu sustenta dezenvolvimentu setór produtivu sira no integra ba planu estratéjiku Governu," nia dehan.

Seremónia ne’e marka ho presensa Diretór Jerál CCI-TL, Diretór Geral SECoop, Eng. Olderico Lopes, Inspektór GIA Gaspar Policarpo Correia, Xefe Gabinete Eng. Leovogildo Belarmino, M.Sc., asesór no lideransa seluk.

#Média SEKoop#