𝟎𝟔 𝐎𝐮𝐭𝐮𝐛𝐫𝐮 𝟐𝟎𝟐𝟓
=============
Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Dato’ Seri Francisco Kalbuadi Lay, fó motivasaun ba Grupu Restaurante Maubara Furak atu kompleta fasilidade sira iha restaurante ne’ebé refere hodi bele atrai vizitante sira. 

Vise-PM, Ministru Koordenadór ba Asuntu Ekonómiku, no Ministru Turizmu no Ambiente, Dato’ Seri Francisco Kalbuadi Lay, hato’o apelu ne’e bainhira inaugura Restaurante Maubara Furak, iha Munisípiu Liquiça, Sesta, 03 Setembru 2025.

Restaurante Maubara Furak hetan tulun husi IX Governu Konstitusionál liuhusi Ministériu Turizmu no Ambiente, hodi mellora atividade turizmu nian iha fatin refere nune’e fó benefísiu ba komunidade sira.

“Ministériu Turizmu Ambiente iha tinan oin tau-matan nafatin. Ai-fuan iha ne’e barak para atrai ema, tara hela iha ne’eba, halo jus para ema ba-mai manas ne’e bele hemu jus, hadi’a halo di’ak tan, ikan iha ne’e barak prepara kondisaun halo di’ak para ema mai, ema tama, ema han iha ne’e,”dehan Vise-PM Dato’ Seri Francisco Kalbuadi Lay.

Xefe Grupu Maubara Furak, Fortunato Afonso Soares, agradese ba IX Governu tanba apoia ona sira-nia grupu ne’e hodi hadi’ak liu tan ekonomia iha baze.