𝟎𝟖 𝐎𝐮𝐭𝐮𝐛𝐫𝐮 𝟐𝟎𝟐𝟓
============
Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Dato’ Seri Francisco Kalbuadi Lay, hala’o enkontru kortezia ida ho Embaixadora Austrália iha Timor-Leste, Caitlin Wilson, hodi ko’alia kona-bá kontinuasaun servisu sira no mós Austrália komprometidu apoia Timor-Leste hafoin adezaun ba bloku rejionál ASEAN (Association of Southeast Asian Nations) iha fulan Outubru, tinan 2025 ne’e.

Enkontru entre Embaixadora Austrália, Caitlin Wilson ho Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Dato’ Seri Francisco Kalbuadi Lay, ne’e hala’o iha Gabinete Vise-PM, Farol, Díli, Tersa, 07 Outubru 2025. 

Iha enkontru ne’e mós diplomata Australiana ne’e aktualiza ba Vise-PM, Dato’ Seri Francisco Kalbuadi Lay, kona-bá forum ekonomia no negósiu Timor-Leste no Austrália, ne’ebé foin lailais hala’o iha Díli, fulan Agostu, tinan 2025 ne’e, no mós ko’alia kona-bá kapasitasaun ba traballadór timoroan sira liuhusi programa PALM (Pacific Australia Labour Mobility) no programa sira seluk tan.