𝟏𝟎 𝐎𝐮𝐭𝐮𝐛𝐫𝐮 𝟐𝟎𝟐𝟓
=============
Sorumutu Konsellu Ministru sira iha loron 01 Outubru 2025 aprova Projetu Rezolusaun Governu ne’ebé aprezenta hosi Ministru Defeza, Donaciano do Rosário Gomes, ne’ebé  kria Gabinete Interministeriál Jestaun Krize.

Nune’e, iha loron Kinta, 09 Outubru 2025, Primeiru-Ministru, Kay Rala Xanana Gusmão delega Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay mak lidera enkontru dahuluk diskuti kona-ba oinsa lala’ok no fahe tarefa serbisu kona-ba estabelesementu Gabinete Interministeriál Jestaun Krize iha Faról-Dili.

Partisipa iha enkontru dahuluk ne’e mak Xefe Estadu Maior Jenerál FALINTIL-FDTL, Tenente Jenerál Domingos Raúl "Falur Rate Laek", Komandante Jerál PNTL, Komisáriu Jerál Henrique da Costa, Diretor Jerál Serbisu Nasionál Intelijensia (SNI), Longuinhos Monteiro, Diretor Polisia Sientifika Investigasaun Kriminál Timor-Leste (PCIC-TL), Vicente Fernandes e Brito, Ministru Justisa, Sérgio de Jesus Fernandes da Costa Hornai, Ministru Interior, Francisco da Costa Guterres, Sekteraiu Estadu Komunikasaun Sosial, Expedito Dias Ximenes no Vise-Ministru ba Assuntu Parlamentar, Adérito Hugo da Costa. 

Gabinete Interministeriál Jestaun Krize nu’udar órgaun foun ne’e sei responsavel ba koordenasaun no definisaun termu sira kooperasaun interministeriál nian iha situasaun risku grave ka ameasa ba seguransa nasionál, atu nune’e bele salvaguarda orden, seguransa no trankuilidade públika, nune’e mós garante atuasaun konjunta no koordenada husi Forsa Defeza, Forsa no Servisu Seguransa, no mós ajente sira Protesaun Sivíl nian.

Gabinete Interministeriál Jestaun Krize sei prezide hosi Primeiru-Ministru no sei kompostu hosi Vise-Primeiru-Ministru sira, Ministru Defeza, Ministru Interiór, Ministru Justisa, Ministru Negósius Estranjeirus no Kooperasaun, Ministra Finansas no Ministru Administrasaun Estatál, no mós Xefe Estadu-Maiór Jenerál F-FDTL, Komandante Jerál PNTL no Diretór-Jerál Servisu Nasionál Intelijénsia Estratéjika nian.

Iha situasaun ne’ebé estraordinária no urjente, funsionamentu Gabinete ne’e sei asegura hosi Ministru Defeza no Ministru Interiór. Bainhira de’it presiza, membru Governu na’in-rua ne’e sei responsabiliza hodi propoin forma sira koordenasaun interministeriál nian no garante koordenasaun medida, planu no operasaun sira ne’ebé ho objetivu atu salvaguarda seguransa interna, ho operasionalizasaun forsa tarefa konjunta ne'ebé estabelese ona. 

Rezolusaun ida-ne'e sei tama iha vigór iha loron ne’ebé hafoin nia publikasaun no sei vigora nafatin to'o loron 6 fulan-janeiru tinan 2026.
@followers