Ermera, 09 Outubru 2025– Sekretáriu Estadu Kooperativas (SEKoop), Eng. Arsénio Pereira da Silva, M.Agr., halo observasaun direta ba progresu konstrusaun edifísiu Kooperativa Kréditu Uniaun Rai Osan Hamutuk Liberta Kiak (CU ROHALIK) iha Gleno, Munisípiu Ermera.

Iha vizita ne’e, Sekretáriu Estadu akompaña Prezidente Kooperativa CU ROHALIK, Mario Madeira, hodi haree direta ba evolusaun traballu konstrusaun, ne’ebé sei sai sede ofisiál atu atende ba fó membru kooperativa sira.

Konstrusaun edifísiu ne’e hetan apoio husi SEKoop liu husi transferénsia públika Orsamentu Jeral Estadu (OJE) tinan fiskál 2025 nian, iha valór total USD 15.000. Apoiu ne’e fó iha rejime sustenta operasional no kapasidade organizativa kooperativa sira iha munisípiu.

“Infraestrutura ida hanesan sede kooperativa importante tebes tanba fó seguransa ba operasaun no aumenta konfiansa membru sira. SEKoop sei kontinua akompaña prosesu ne’e hodi too finaliza,” hateten Sekretáriu Arsénio.

Edifísiu sede ne’e sei fó kontribuisaun boot ba servisu kooperativa, hanesan akomoda reuniaun, administrasaun, rejistu membru, hodi bele servisu liu-di'ak no profesional ba membru no komunidade sira.

Prezidente Kooperativa CU ROHALIK, Mario Madeira, agradece ba SEKoop nia apóiu, no promete kontinua implementa konstrusaun ne’e ho trasparénsia, planeamentu no koordenasaun atu bele remata iha tempu Ne'ebé maka determina.

#Média SEKoop#